АҚШ президенти Жо Байденнинг фикрича, Владимир Путин Украинада тактик ядро қуролидан фойдаланиш эҳтимоли ҳақида гапирганда «ҳазиллашмаяпти». Байденнинг сўзларига кўра, дунё 1962 йилдаги Кариб денгизи инқирозидан кейин биринчи марта ядро қуролидан фойдаланиш таҳдидига дуч келмоқда.
Маълумот учун Кариб инқирози — 1962 йил октябрь ойида АҚШ ва СССР ўртасида юзага келган сиёсий, дипломатик ва ҳарбий қарама-қаршиликнинг номи. Бунга АҚШнинг Туркиядаги базага, Москванинг эса Кубага ядро қуроли жойлаштиргани сабаб бўлган. Вазият Совет Иттифоқи Коммунистик партияси Марказий комитети биринчи Котиби Никита Хрушчов ва АҚШ президенти Жон Кеннеди ўртасидаги суҳбат орқали ҳал қилинган.
Байден Россия президенти Владимир Путинни «яхши» билишини айтди.
«У тактик ядро қуроллари, биологик ёки кимёвий қуроллардан фойдаланиш эҳтимоли ҳақида гапирганда ҳазиллашмайди», — деди АҚШ президенти.
Байден тактик ядро қуролидан фойдаланиш тезда назоратдан чиқиб кетиши ва глобал ҳалокатга олиб келиши мумкинлигидан огоҳлантирди. У АҚШ дипломатик ечим излаётганини қўшимча қилди.
Россия Украинага бостириб кирганидан кейин Россия президенти Владимир Путин, ҳукумат амалдорлари ва тарғиботчилар Россия ядро қуролидан фойдаланиши мумкинлигига қайта-қайта ишора қилди. 21 сентябрь куни Путин сафарбарлик бошланиши ҳақидаги мурожаатида Россия ҳукумати ўз ҳудудларини ҳимоя қилиш учун «ихтиёридаги барча воситаларни» ишга солишга тайёрлигини айтди.
Изоҳ (0)