Кимё бўйича Нобель мукофоти органик синтезнинг инновацион услублари учун берилди

Кимё бўйича 2022 йилги Нобель мукофоти америкалик Каролин Бертоцци ва Барри Шарплессга ҳамда даниялик Мортен Мелдалга берилди. Бу ҳақда Нобель қўмитаси Twitter орқали маълум қилди.

https://twitter.com/НобелPrize/status/1577596410253508608

Олимлар «клик-кимё ва биоортогонал кимё услубларини ишлаб чиққани» учун мукофотланди. Гап органик синтезнинг инновацион услублари ҳақида бормоқда, улар янги бирикмаларни, шу жумладан, янги дориларни яратиш жараёнини анча соддалаштиради ва самаралироқ қилади.

Клик-кимё жуда хилма-хил бирикмалар синтези учун универсал ёндашув (махсус «адаптерлар»)дан фойдаланишни кўзда тутади. Бундай ёндашув янги бирикмаларни яратиш жараёнида иккиламчи реакцияларни сезиларли даражада камайтириш ва умуман синтез схемасини соддалаштириш имконини беради. Клик-кимё Барри Шарплесс томонидан 2000 йиллар бошида ишлаб чиқилган ва Мортен Мелдалнинг ишланмалари билан тўлдирилган.

Асосий ҳисса Каролин Бертоцци томонидан қўшилган биоортогонал кимё деганда худди шундай ёндашувларни энди тирик организмлар ичида қўллаш назарда тутилади. Бертоццининг ишланмалари ёрдамида тирик ҳужайралар юзасида, уларнинг ўзига зарар бермаган ҳолда, йўналтирилган кимёвий реакциялар ўтказиш мумкин бўлди.

2022 йилги Нобель ҳафталиги 3 октябрда бошланди. Анъанага кўра, биринчи бўлиб тиббиёт ва физиология бўйича мукофот ғолиблари эълон қилинди. 2022 йилда швед олими Сванте Паабо «йўқ бўлиб кетган гомининлар геноми ва инсон эволюциясига оид кашфиётлар» учун мукофотга сазовор бўлди.

4 октябрь куни эса физика бўйича Нобель мукофоти совриндорлари эълон қилинди. Бу йилги мукофот уч нафар олим — Ален Аспе (Франция), Жон Ф. Клаузер (АҚШ) ва Антон Зайлингерга (Австрия) «чигал фотонлар билан тажриба ўтказгани, Белл тенгсизликларининг бузилишини аниқлагани ва квант информатикасидаги кашфиётлари» учун берилди.

6 октябрь куни адабиёт бўйича Нобель мукофоти совриндорлари эълон қилинади. 7 октябрь куни Ослода тинчлик бўйича мукофот соҳиби маълум бўлади. 10 октябрда эса иқтисодиёт бўйича Нобель мукофотини ким олгани эълон қилинади.

Мукофотларни топшириш маросими 10 декабрда — мукофот таъсисчиси Алфред Нобель вафот этган кунда бўлиб ўтади. Одатда совриндорлар мукофотларни Швеция қироли Карл XVI Густав иштирокидаги тантанали маросимда шахсан қабул қилиб олади. Бироқ 2020 ва 2021 йилларда коронавирус пандемияси туфайли, маросим видеоформатда ўтказилганди.

2021 йилда кимё бўйича Нобель мукофотини Бенжамин Лист ва Дэвид Макмиллан «асимметрик органокатализни ривожлантиргани учун» қўлга киритганди.