Green Card нима ва уни қандай қўлга киритиш мумкин? Энг асосий маълумотлар

Навбатдаги диверсификацион лотерея бошланиши арафасида «Дарё» грин-карта ҳақида, унинг нима учун кераклиги ва қандай қилиб унинг соҳибига айланиш мумкинлиги ҳақида маълумотлар тўплаб, ҳавола этмоқда.

Green Card ўзи нима ва нега ҳамма уни қўлга киритишни хоҳлайди?

АҚШ грин-картаси — АҚШ фуқароси бўлмаган, аммо у ерда доимий яшайдиган одамнинг истиқомат учун гувоҳномаси борлигини тасдиқлайдиган ва унга ишга жойлашиш ҳуқуқини берадиган идентификация картаси.

Грин-карта ҳеч қандай тўсиқларсиз мамлакатни тарк этиш ва қайтиб келиш, ишлаш, кўчмас мулкка эгалик қилиш, маҳаллий банкларда манфаатлироқ кредитларни олиш, олий таълим муассасаларида чегирмалар билан ўқиш ва АҚШ фуқаролари учун мўлжалланган степендияларга даъвогарлик қилиш, баъзи турдаги қуролли кучларда хизмат қилиш ҳамда Америка фуқаролари учун бошқа имтиёз ва нафақалардан фойдаланиш имконини беради.

Грин-карта одатда 10 йилга берилади, унга эга бўлгандан сўнг 5 йил ўтгач, АҚШ фуқаролигини олиш учун ариза бериш мумкин.

У қандай мажбуриятларни юклайди?

Сиз АҚШ қонунларига риоя қилишингиз, даромадлар ҳақида декларация эълон қилишингиз ва солиқларни тўлашингиз, яшаш жойи ўзгаргани ҳақида миграция хизматини хабардор қилишингиз керак бўлади. 18 ёшдан 25 ёшгача бўлган эркаклар эса зарурият юзага келганда армияда хизмат қилиш эҳтимоли учун Селеcтиве Service’да рўйхатдан ўтиши шарт.

Мамлакатдан чиқиш мумкинми?

Грин-карта эгаси тақвим йили мобайнида камида 6 ой АҚШда бўлиши мақсадга мувофиқ. Агар сиз олти ойдан кўпроқ, аммо бир йилдан камроқ вақт мамлакатдан ташқарида бўлган бўлсангиз, киришда узоқ вақт АҚШда бўлмагани сабаби ҳақида сўрашади. У ҳолда бундай сабабларга далилларни тақдим этиш керак бўлади.

Агар АҚШдан бир йилдан кўпроқ вақтга кетиш зарур бўлса, шундан кейин мамлакатга кириш учун рухсатнома олишга ариза берилади (Реентрй Пермит).

Муҳим нарса: мамлакатдан ташқарида бўлиш муддатлари фуқаролик олиш имкониятига таъсир ўтказади. Грин-картани қўлга киритгандан кейин беш йил ўтиши билан Америка фуқаросига айланиш учун АҚШ ҳудудида ҳаммаси бўлиб камида 2,5 йил яшаган бўлиш керак.

Грин-картани қандай қўлга киритиш мумкин?

АҚШ грин-картасини олишнинг бир нечта йўллари бор:

1. АҚШ фуқароси билан турмуш қуриш

Таъкидлаш жоиз, ушбу схема нафақат қизлар, эркаклар учун ҳам ишлайди. Бўлғуси эр-хотинлар учун талабларни мана бу ерда ўқиш мумкин.

2. Оила билан қайта бирлашиш

Бу усулдан АҚШ фуқаросининг энг яқин қариндошлари — турмуш ўртоғи, 21 ёшгача бўлган, турмуш қурмаган фарзандлари, ота-онаси, 21 ёшдан ошган ака-ука ва опа-сингиллари фойдаланиши мумкин.

3. Меҳнат иммиграцияси

Бу тоифадаги визани қўлга киритиш учун бўлғуси иш берувчи петиция бериб, сиз учун бир неча доллар тикиши керак. Бундан ташқари, йилига бериладиган Ҳ-1Б визалари сони чекланган: умумий квота 65 мингта бўлиб, магистр ва ундан юқори даража эгалари учун қўшимча 20 мингта виза кўзда тутилган.

4. Сиёсий бошпана

Уни қўлга киритиш учун ўз мамлакатида ирқий, диний, сиёсий ёки бошқа мақсадларда таъқиб қилинаётганини исботловчи далилларни тақдим этиш зарур.

5. Инвестициялар

Инвестициялар эвазига ҳам грин-карта эгасига айланиш мумкин.

6. Диверсификацион лотерея

Green Card лотереяси нима ва унда кимлар қатнашиши мумкин?

Диверсификацион лотерея — АҚШда доимий яшовчи мақоми (грин-карта)ни олиш ҳуқуқини берувчи визалар ўйналадиган лотерея. У ҳар йили ўтказилади.

Унда АҚШга иммиграция даражаси паст бўлган мамлакатлардан зиёлилар (тугалланган ўрта таълим) ёки касбий тажрибага эга бўлганлар (камида 2 йиллик иш стажи) қатнашиши мумкин.

Ютиб олиш эҳтимоли қанақа?

Ҳар йили қарийб 55 мингта грин-карта ўйналади, лотереяда эса миллионлаб хоҳловчилар қатнашади (аниқроғи, ҳар йили қарийб 10 миллион киши). Шу тариқа, грин-картани ютиб олиш эҳтимоли — тахминан 200 га 1. Ғолиб тасодифий тарзда компьютер томонидан аниқланади.

Грин-картани қандай ютиб олиш мумкин?

АҚШ фуқаролик ва иммиграция хизмати расмий сайтида анкетани тўлдириб, тегишли талабларга жавоб берувчи фотосуратни илова қилиш ва тасдиқлаш кодини олиш керак, у орқали кейин лотерея натижасини билиш мумкин. Унда қатнашиш бепул. Аризани ҳар йили бериш мумкин.

Ютгандан кейин нима қилиш керак?

Грин-картани ютиб олиш — ҳали ҳаммаси эмас. Ундан кейин тегишли ҳужжатларни топшириш, консуллик йиғимини тўллаш, элчихонада суҳбатдан ўтиш керак — шундан кейингина АҚШга кетиш мумкин бўлади.