Ўз-ўзини халқ республикаси деб эълон қилган Луганск раҳбари Леонид Пасечник Россия президентига мурожаат қилиб, «ЛХРнинг субъект ҳуқуқи асосида РФ таркибига кириши масаласини кўриб чиқишни илтимос» қилди. Бу ҳақда «ТАСС» хабар бермоқда.
Пасечник бу ҳақда махсус ёзиб олинган телемурожаатида айтиб ўтган. У, шунингдек, ЛХРдагилар «Россиянинг кўп миллатли халқи билан тарихий, маданий ва маънавий алоқасини» англашини таъкидлади.
«РИА Новости» хабарига кўра, Херсон вилояти истило маъмурияти раҳбари Владимир Сальдо ҳам Путинга «Россия таркибига қўшилиш»ни сўраб мурожаат қилган.
Расман тасдиқланмаган маълумотларга кўра, Россия президенти Владимир Путин ЛХДР, ДХР ҳамда Херсон ва Запорожье вилоятларининг босиб олинган ҳудудлари РФ таркибига қўшилганини 30 сентябрь куни эълон қилиши мумкин.
Шундан кейин парламентнинг иккала палатаси ҳам Путин томонидан имзоланган тегишли қонунларни маъқуллаши мумкин. Давлат думаси спикери Вячеслав Володин маълум қилишича, Россия парламентининг қуйи палатаси 3 октябрь куни режадан ташқари мажлисига йиғилади, бундай қарор айнан нима билан боғлиқлигига у аниқлик киритмади.
Россия парламентининг юқори палатаси Федерация кенгаши эса аннексияни 4 октябрь кунги мажлисда тасдиқлаши мумкин. Спикер Валентина Матвиенко бу масалада режадан ташқари йиғилиш ўтказилмаслигини маълум қилди.
Аввалроқ ДХР раҳбари Денис Пушилин «Россияга қўшилиш бўйича юридик жараён»ни якунлаш учун Москвага йўл олганини маълум қилганди. ХУдди шундай мақсад билан Россияга сафари ҳақида ЛХР раҳбари ҳам айтиб ўтганди.
Референдумлар
Россия таркибига кириш ҳақидаги референдумларда овоз бериш 27 сентябрь куни якунланди. 28 сентябрь куни эрталаб Донбасс сайлов комиссиялари овозларнинг 100 фоизи кўриб чиқилганидан кейин референдумлар натижаларини эълон қилди. Уларнинг айтишича, ЛХР сайловчиларининг 98,42 фоизи, ДХР электоратининг 99,23 фоизи, Запорожье ва Херсон вилоятлари босиб олинган ҳудудлари аҳолисининг эса тегишли равишда 93,1 фоизи ва 87,05 фоизи Россия таркибига қўшилишни ёқлаб овоз берган.Референдумлар бошланишидан олдиноқ Путин Россия Донбасс, шунингдек, икки вилоят фуқароларининг якуний қарорини қўллаб-қувватлашини айтганди.
АҚШ ва Евроиттифоқ эса референдум натижаларини тан олмаслигини маълум қилган ва у ўтказилган тақдирда, Россияга қарши янги санкциялар киритиш билан таҳдид қилганди. Шунингдек, Сербия ва Туркия ҳам овоз бериш якунларини тан олмаслигини билдирган.
Изоҳ (0)