27 сентябрь куни Донбасс республикалари ва Украинанинг босиб олинган ҳудудларида «референдум» натижалари маълум қилинди. Ташкилотчиларнинг маълум қилишича, ушбу ҳудудлар аҳолисининг гўёки 87—99 фоизи «Россияга қўшилиш»ни қўллаб-қувватламоқда. Россиянинг Грузия билан чегарасидаги «Верхний Ларс» назорат-ўтказиш пунктида ҳарбий комиссариатнинг сафарбарлик пункти очилди — у ерда 21 сентябрдан бери минглаб россияликлар мамлакатдан чиқиб кетишга уринмоқда.
Шимолий Осетия ҳукумати Россиянинг бошқа минтақалари аҳолиси учун республикага киришни чеклади. Россия Мудофаа вазирлиги сафарбарликдан бўйин товлаган россияликларни экстрадиция қилиш сўрови билан қўшни давлатлар расмийларига мурожаат қилиш режалаштирилмаётганини маълум қилди. Украина Қуролли Кучлари Оскол дарёсининг чап қирғоғида жойлашган шаҳар типидаги Купянск-Узловой посёлкасини озод қилди. Бу Харьков вилоятидаги энг йирик темир йўл кесишмаларидан бири. Meduza урушнинг 216-кунида олинган энг асосий суратлар билан бўлишди.
Харьков вилоятидаги ҳаёт
Одесса вилояти кўнгиллилари Украина армияси учун машина ва печкалар ясамоқда
Одесса вилоятидаги Белгород—Днестровский шаҳрида кўнгиллилар гуруҳи Украина армияси эҳтиёжлари учун ҳарбий ва фуқаролик автомашиналарини таъмирлаш билан шуғулланмоқда, шунингдек, уларда қишда фойдаланиш учун аскарларга темир печкалар ясамоқда.
«Референдумлар»
Украинанинг Россия қўшинлари томонидан босиб олинган Херсон ва Запорожье вилоятлари ҳудудларида, шунингдек, ўзини ўзи республика деб эълон қилган ДХР ва ЛХРда Россияга қўшилиш бўйича «референдумлар» ўтказилди. Россиянинг ўзи назорат қилаётган ушбу ҳудудларда овозлар 100 фоиз санаб чиқилганидан кейин, «Россияга қўшилиш»ни гўёки Запорожье вилоятида 93,11 фоиз, Херсонда 87,05 фоиз, ДХРда 99,23 фоиз, ЛХРда 98,42 фоиз одам қўллаб қувватлаган.
Россия чегараларида навбатлар
Сафарбарлик эълон қилингач, минглаб россияликлар зудлик билан мамлакатни тарк эта бошлади. Шу сабабли, Россиянинг қўшни давлатлар билан чегараларида кўп километрлик тирбандликлар пайдо бўлди. 100 мингга яқин россиялик Қозоғистонга борган, уларга маҳаллий аҳоли ва кўнгиллилар ёрдам бермоқда. 27 сентябрь куни Россия—Грузия чегарасидаги «Верхний Ларс» назорат-ўтказиш пунктида навбат 5,5 минг машинадан ошиб кетди, тирбандлик узунлиги 20 километрдан 30 километргача етди. Сўнгги 24 соат ичида Россия ва Грузия чегарасини 10 минг киши кесиб ўтган.
Сафарбарлик
Россияда 21 сентябрда эълон қилинган сафарбарлик давом этмоқда. Оммавий ахборот воситалари ва ҳуқуқ ҳимоячиларининг кўплаб хабарларига кўра, ҳарбий хизматга чақирув тартибсиз ўтмоқда. Чақирув қоғозларини ҳатто аввал ҳарбий хизмат ўтамаган ва жанговар тажрибага эга бўлмаганлар ҳам олмоқда. Сафарбар қилинганлар эса ҳеч қандай тайёргарликсиз жангга жўнатилганини айтишмоқда.
Изоҳ (0)