Латвия ҳукумати мамлакатнинг Россия билан чегарадош ҳудудларида фавқулодда ҳолат жорий қилди. Бу ҳақда Латвия ҳукумати сайтида хабар берилган.
Фавқулодда ҳолат режими Латвиянинг Алуксне, Балви ва Лудза вилоятларида 28 сентябрдан бошлаб уч ой давомида амал қилади. Режим аэропортлар, денгиз ва темир йўл орқали чегаралар кесиб ўтиладиган жойларга ҳам тааллуқли.
Фавқулодда ҳолатнинг жорий этилиши чегарада ноқонуний муҳожирлар сонининг кўпайиши хавфи билан изоҳланмоқда.
Ҳозирда Латвия ва Россия чегарасида вазият барқарор, осойишта ва қаттиқ назорат остида, бироқ Россияда сафарбарлик эълон қилиниши билан ўз мамлакатини тарк этишни истаган россияликлар сони сезиларли даражада ошди. Шу сабаб Латвия—Россия чегарасида ҳам ноқонуний муҳожирлар сонининг тез суръатлар билан кўпайиши хавфи мавжуд. Фавқулодда чораларнинг мақсади унга олдиндан тайёргарлик кўришдир, — дейилади хабарда.Россия Федерациясида сафарбарлик бошланганидан сўнг, мамлакатнинг Европа Иттифоқи мамлакатлари билан чегарасини кесиб ўтган россияликлар сони 30 фоизга ошди. Уларнинг аксарияти ЕИга Финляндия ва Эстония орқали кирмоқда.
Изоҳ (0)