24 сентябрь куни инвестициялар ва ташқи савдо вазири Жамшид Хўжаев раҳбарлигида конференцалоқа воситасида импортни оптималлаштириш ҳамда тармоқлараро ва ҳудудлараро саноат кооперациясини ривожлантириш масалаларига бағишланган йиғилиш бўлиб ўтди. Бу ҳақда ITSV ахборот хизмати хабар қилди.
Қайд этилишича, йиғилишда вазирликлар ва идоралар, тармоқ бирлашмалари ҳамда Қорақалпоғистон, вилоятлар ва Тошкент шаҳар маҳаллий ҳокимлик органларининг раҳбарлари иштирок этган.
Тасдиқланган дастурга мувофиқ, жорий йилнинг ўтган даврида маҳаллийлаштириш дастури доирасида 24,3 триллион сўмлик импорт ўрнини босувчи маҳсулотлар ишлаб чиқарилган. Электрон кооперация портали орқали 7,9 триллион сўмлик 36,6 мингта ҳамкорлик шартномалари имзоланган. Улар доирасида бугунги кунда 3,7 триллион сўмлик маҳсулот тўлиқ етказиб берилган.
Қорақалпоғистон Республикаси, Жиззах, Сирдарё, Самарқанд, Сурхондарё, Наманган, Фарғона, Андижон ва Хоразм вилоятларида ўтказилган ҳудудий тармоқлараро саноат ярмаркалари давомида 2,8 триллион сўмлик 6,3 мингта шартнома ва 220 га яқин техник ҳамкорлик меморандумлари имзоланган.
Шунингдек, маҳаллийлаштириш дастурини амалга ошириш, мамлакатда аналоглари ишлаб чиқарилаётган маҳсулотлар импортини камайтириш, электрон кооперация портали орқали тузилган шартномалар шартларини бажариш, йирик саноат корхоналарида импортга боғлиқлик даражасини пасайтириш билан боғлиқ долзарб масалалар конструктив тарзда муҳокама қилинган.
Тармоқ бирлашмалари ва маҳаллий ҳокимият органларининг масъул раҳбарлари юқоридаги барча йўналишлар доирасида амалга оширилган ишлар ҳамда яқин ва ўрта муддатли истиқболдаги режалари тўғрисида батафсил ҳисоботларни тақдим этган. Уларга камчиликларни бартараф этиш ва ўз вақтида маҳаллийлаштириш дастурини амалга ошириш, 2023—2024 йилларда тармоқлар ва ҳудудлар кесимида импорт ўрнини босувчи маҳсулотларнинг янги турларини ишлаб чиқаришни назарда тутувчи маҳаллийлаштириш дастурини ишлаб чиқиш бўйича топшириқлар берилган.
Алоҳида тартибда жорий йилнинг ноябрь ойида Тошкент шаҳрида Республика тармоқлараро саноат ярмаркасини ташкил этиш масаласи кўриб чиқилган.
Йиғилиш якунида тегишли раҳбарларга вазифаларни ўз вақтида бажариш бўйича қўшимча топшириқлар берилган.
Изоҳ (0)