Rossiya prezidenti Vladimir Putin amerikalik Edvard Snoudenga Rossiya fuqaroligini taqdim etdi. Bu haqdagi farmon huquqiy axborot rasmiy internet-portaliga joylandi, deb yozadi Meduza.
“Interfaks” Snoudenning manfaatlarini himoya qiluvchi advokat Anatoliy Kucherena bilan bog‘lanib, uning mijozi safarbarlik doirasida Rossiya armiyasiga chaqirilish-chaqirilmasligi bilan qiziqdi. “Edvard Rossiya armiyasida xizmat qilmagani, harbiy xizmat bo‘yicha amaliyot va tajribaga ega bo‘lmagani sababli, u safarbarlikka jalb etilmaydi”, — deb javob berdi Kucherena.
Nashr qayd etishicha, Rossiyada harbiy xizmat o‘tamagan fuqarolarning armiyaga chaqirilishi bilan bog‘liq birorta ham holat kuzatilmagan.
Snouden Amerika Markaziy razvedka boshqarmasi va Milliy xavfsizlik agentligi sobiq xodimi bo‘lib, 2013-yilda AQSH maxsus xizmatlarining fuqarolarni kuzatish usullarini fosh qilgan va dunyo yetakchilari telefonlari tinglanishi haqida aytib bergan edi. AQSHda u josuslikda va davlat mulkini o‘g‘irlaganlikda ayblanmoqda. U maxfiy ma’lumotlarni fosh qilgani uchun 30 yilga qamalishi mumkin.
Snouden dastlab Gonkongga, so‘ng Rossiyaga qochgan. “Sheremetyevo” aeroportining tranzit zonasida bir oydan ko‘p vaqt yashagan. So‘ng Snoudenga Rossiyada vaqtinchalik boshpana taqdim etilgan. 2020-yilda u ushbu mamlakatda muddatsiz yashash uchun ruxsatnomaga ega bo‘ldi va Rossiya fuqaroligini olish uchun ariza berdi.
Izoh (0)