Бугун, 21 сентябрь куни Ўзбекистон Олий суди кассация судлов ҳайъати суд мажлисида Соғлиқни сақлаш вазирлигининг ноқонуний бўшатилган икки ходими қайта ишга тикланди ва уларга етказилган моддий зарар қоплаб бериладиган бўлди. Бу ҳақда «Дарё» мухбири хабар бермоқда.
Кассация суд мажлисида бир хил мазмундаги иш кўриб чиқилди. Яъни 2021 йилнинг июль ойида Соғлиқни сақлаш вазирининг тегишли буйруғи билан Юридик бўлим бошлиғи Руслан Муҳаммадиев ва Комплеанс, ички аудит ва молиявий назорат хизмати бошлиғи Бахтиёр Хажихановни ишдан бўшатилади.
Ишда бўшатишга асос сифатида президентнинг собиқ маслаҳатчиси Абдужаббор Абдувоҳитовнинг ССВга юборган кўрсатма хати: «Соғлиқни сақлаш вазирлигида фаолият олиб бораётган қуйидаги ходимларни жорий йилнинг 5 июль кунидан эгаллаб турган лавозимидан озод этиш сўралади», деб 4 нафар ходимнинг рўйхати зикр этилган. Улар орасида Руслан Муҳаммадиев ҳамда Бахтиёр Хажиханов ҳам бўлган.
Давлат маслаҳатчисининг хатига мувофиқ ССВ ходимларни Меҳнат кодексининг 106-моддаси 6-банди билан «қонунда назарда тутилган бошқа ҳоллар»да деган пункти билан ишдан бўшатиб юборган.
Адвокат Баҳодир Аҳмедовнинг таъкидлашича, мавжуд вазиятда жавобгар иш берувчининг энг катта хатоси президентнинг собиқ давлат маслаҳатчиси томонидан юборилган 2021 йил июлда хатини қонунда назарда тутилган бошқа ҳоллар деб қабул қилгани ва шу асосда буйруқ чиқарганидир.
«Қонунда назарда тутилган бошқа ҳоллар деганда биз фақатгина, қонун деб номланган норматив-ҳуқуқий ҳужжат турида назарда тутилган Меҳнат кодексининг 106-моддаси 1-5-бандларидан ташқаридаги бошқа бир ҳолатларни тушунамиз, президент давлат маслаҳатчисининг хати ҳеч қанчон бундай қонуннинг ўрнини боса олмайди. Меҳнат шартномасини бекор қилиш ҳақидаги буйруқнинг на кириш қисмида, на баён ва на якуний асос қисмида бирорта қонун ёки қонун ҳужжатидаги бошқа ҳолатлар келтирилмаган. Меҳнат кодексининг 106-моддаси 6-бандида эса, айнан қонундан олинган алоҳида ҳолатлар буйруқ чиқариш учун асос бўлиши мумкинлиги қайд этилган. Бу важларимиз ҳам буйруқнинг ноқонунийлигини тўлақонли равишда тасдиқлайди», — деди адвокат.
Иш Олий судга келгунга қадар фуқаролик ишлари бўйича Шайхонтоҳур туманлараро суди ва фуқаролик ишлари бўйича Тошкент шаҳар суди томонидан бу хатни қонунга тенглаштириб қўйган, Меҳнат кодексининг 106-модда 6-банди бўйича тўғри бўшатилган деб топган.
Олий суднинг фуқаролик ишлари бўйича кассация судлов ҳайъати судьялари меҳнат муносабатларини бекор қилиш масаласида бирор-бир қонун бўйича ваколатга эга бўлмаган давлат маслаҳатчисининг хати ходимларни тўғридан-тўғри ишдан олишга, хусусан, Меҳнат кодексининг 106-моддаси 6-банди билан меҳнат шартномасини бекор қилишга асос бўла олмаслигини таъкидлади.
Суд даъвогралар: Руслан Муҳаммадиев ва Бахтиёр Хажихановни ўз ишига тикланиши, ноқонуний буйруқ бекор қилиниб, уларга етказилган моддий зарар (мажбурий прогул суммаси) жами 338 миллион сўмни ундирилиши ҳақида ажрим чиқарди.
Изоҳ (0)