Ўзбекистонга Россиядан юқори ҳосил берадиган, турли об-ҳаво шароитларига чидамли буғдой навлари уруғлиги олиб келинди. Бу ҳақда Қишлоқ хўжалиги вазирлиги хабар қилди.
Қайд этилишича, узоқ йиллардан буён экиб келинаётган ғалла навларини серҳосил ва турли стресс омилларга чидамли навлар билан янгилаш ҳамда ғалла навдорлиги, дон ва ун маҳсулотларининг сифатини яхшилаш мақсад қилинган. Шу сабаб республика ҳудудларининг иқлим шароити ва об-ҳавонинг турли хил стресс факторларига бардошли Россия селексиясига мансуб эртапишар, юқори ҳосилли буғдой навларининг 20 минг тонна уруғлиги Жиззах вилоятидаги Кентекс МЧЖ агрокластери томонидан ўз маблағлари ҳисобига олиб келинган.
Бугунги кунда ушбу уруғлик донни белгиланган тартибда тозалаш, саралаш, дорилаш ва қадоқлаш бўйича тадбирлар олиб борилмоқда. Уруғлик донни республика бўйлаб кузги муддатларда экиш учун ғалла етиштирувчи агрокластер ва фермер хўжаликларига тўғри тақсимлаш ҳамда етказиб бериш ишлари эса Уруғчиликни ривожлантириш маркази томонидан ташкиллаштирилмоқда. Импорт қилинган мазкур уруғлар ҳисобига Ўзбекистон шароитида ғалла ҳосилдорлиги 10-15 фоизга ошиши кутилмоқда.
Уруғчиликни ривожлантириш маркази томонидан 2023 йил ҳосили учун уруғлик ғалла майдонларида ўтказилган дала апробацияси натижаларига кўра, 77,8 минг гектар ер майдонлари яроқли деб топилган ҳамда 270 минг тоннадан ортиқ уруғлик дон жамғарилган.
«Соҳа олим ва мутахассисларининг кўп йиллик таҳлилларига кўра, Россия Федерациясининг Краснодар ўлкасидаги П.П.Лукяненко номидаги Дон миллий маркази селексиясига мансуб республикамиз тупроқ-иқлим шароитига мос, табиатнинг турли стресс омилларига чидамли серҳосил буғдой навларининг юқори авлодли уруғликлари ҳисобига бошоқли дон экинларидан юқори ва барқарор ҳосил етиштириш имкониятларини бермоқда.
Мазкур марказ селексионер олимлари билан 1997 йилдан буён ҳамкорлик алоқалари ўрнатилган бўлиб, ҳар йили ушбу илмий муассасанинг 25-30 та янги селексион нав ва линиялари синовдан ўтказилиб, маҳаллий шароитларга интродуксия қилиб келиняпти», — дейилади хабарда.
Изоҳ (0)