АОКАда ўтказилган брифингда «Ўзтемир йўлназорат» инспекцияси ахборот хизмати раҳбари Фирдавс Хайриддинов соҳага оид қабул қилинган янги қонунчилик ҳужжатлари мазмуни ҳақида маълумот берди.
Қайд этилишича, темир йўл транспорти ҳамда метрополитенда ҳаракат ва ташишлар хавфсизлиги талабларининг бузилиши билан боғлиқ ҳодисаларни таснифлаш, хизмат текшируви олиб бориш тартиби белгиланган. Транспорт вазирлигининг тегишли буйруғи, шунингдек, келгусида ҳаракат ва ташишлар хавфсизлиги бузилишлари келиб чиқишининг олдини олишга хизмат қилади.
Ҳудудида ҳаракат ва ташишлар хавфсизлиги талабларининг бузилиши билан боғлиқ ҳодисалар содир бўлган темир йўл транспорти субъектлари ёки метрополитен масъул ходимлари мавжуд алоқа воситаси орқали ваколатли органларни ҳамда ҳаракатдаги таркиб ва юк манфаатдори ёки эгаларини содир бўлган ҳодиса ҳақида дарҳол хабардор қилишлари лозим бўлади.
Содир бўлган ҳолатнинг кўламидан келиб чиқиб, Транспорт вазирлиги комиссияси, темир йўл транспорти субъекти комиссияси ва метрополитен комиссияси тузилади. Комиссиялар ўз ваколати доирасида хизмат текширувини ташкил қилиш ҳамда якуний хулоса бериш юзасидан қарорлар қабул қилади.
Хизмат текширувини ўтказиш муддати ўн беш иш кунидан ортиқ бўлмаслиги керак.
Изоҳ (0)