Тожикистон билан зиддият оқибатида Қирғизистонга етган зарар, дастлабки маълумотларга кўра, 1,5 миллиард сом (18,5 миллион доллар)ни ташкил қилган. Бу ҳақда мамлакат Хавфсизлик кенгаши котиби Марат Иманқулов матбуот анжуманида айтиб ўтди, деб ёзади «24.кг».
Унинг сўзларига кўра, ушбу сумма ўсиши мумкин.
«Икки ҳафта давомида Ак-Суу дарёсидаги кўприкни қуриб битирамиз. Электр узатиш линиялари, уяли алоқа оператторлари ретрансляторлари қайта тикланмоқда. Президент Боткен вилоятидаги низо чоғида вайрон бўлган инфратузилмани қайта тиклаш ҳақида фармон имзолади. Агрессор томонидан етказилган зарарни аниқлаш бўйича комиссия тузилди. Дастлабки маълумотларга кўра, моддий зарар қиймати 1,5 миллиард сомга тенг бўлди», — деди Марат Иманқулов.
Аввалроқ Марат Иманқулов Тожикистон билан чегарадаги можарода экстремистик гуруҳлар иштирок этаётган бўлиши мумкинлигини маълум қилганди.
Қирғизистон ва Тожикистон ўртасидаги муносабатлар ўтган ҳафта кескинлашган бўлиб, давлатлар бир-бирини ўт очишни тўхтатиш режимини бузганликда айблаган ва чегара қишлоқлари ўққа тутилгани ҳақида хабар берилган эди. Боткен вилоятининг Боткен ва Лейлек вилоятлари ва Қирғизистоннинг Ўш вилоятининг бир қисми, шунингдек, Сўғд вилоятининг Исфара ва Ғофуров вилоятларининг бир қисми ҳамда Тожикистоннинг Лахш вилоятида ҳам тўқнашувлар қайд этилган. Боткен вилоятида фавқулодда ҳолат режими ҳам жорий этилган эди. Вазият авж олиш вақтларда томонлар ўт очишни тўхтатишга бир неча бор келишиб олишган, бироқ келишувларга риоя қилинмаган.
19 сентябрь куни кечқурун Қирғизистон ва Тожикистон чегарадаги вазиятни барқарорлаштириш ва икки давлат ўртасида тинчлик ўрнатиш тўғрисида протокол имзолади.
Изоҳ (0)