Британия 2023 йилда Украинага 2,6 млрд долларлик ҳарбий ёрдам ажратади

Буюк Британия бош вазири Лиз Трасс БМТ Бош Ассамблеясида расмий Лондон келаси йил Киевга камида 2,3 миллиард фунт стерлинг (2,64 миллиард доллар) миқдорида ҳарбий ёрдам тақдим этмоқчи эканини эълон қилади, деб ёзади «РБК».

Буюк Британия бу йил деярли шу суммага тенг ҳажмда ҳарбий ёрдам ажратди ва ушбу мақсадга харажатлар ҳажми бўйича иккинчи давлатга айланди. Financial Times маълумотларига кўра, Трасс ўз нутқи чоғида Ғарб мамлакатларини Украинани қўллаб-қувватлашни кучайтиришга чақиришни режалаштирмоқда.

«РБК» ҳисоб-китобларига кўра, июнь охирига қадар Буюк Британия Украинага 3,9 мингдан ортиқ NLAW танкка қарши мажмуаларини, 120 та «Мастиф» зирҳли машиналарини, 200 та юқори техник Brimstone-1 ракеталарини, шунингдек, номаълум сондаги кемага қарши ракета мажмуаларини, баравар ўт очиш ракета тизимларини, оғир дронларни ва бошқа қурол-яроғларни етказиб берган.

Сайловолди мунозаралар чоғида Трасс Россия ва Украина ўртасида тинчлик битими тузилишига қарши чиқиб, Киевга «тоза ғалаба» кераклигини айтганди. Унинг таъкидлашича, Украина томони Ғарб мамлакатларидан максимал даражада кўп ёрдам олиши керак.

Шу билан бирга, у Буюк Британия низога тўғридан-тўғри аралашмаслиги кераклигини қайд этган. Трасс Украина НАТОга аъзо эмаслигини ва шу сабабли альянснинг коллектив мудофаа тўғрисидаги шартномаси билан ҳимояланмаганини эслатди. Шу сабабли, деди у, минтақага «Британия қўшинлари ва ресурсларини тўғридан-тўғри жойлаштириш нотўғри» бўлган бўларди.

Лиз Трасс ҳукмрон Консерватив партия етакчилиги учун курашда ғолиб чиқиб, 6 сентябрь куни Буюк Британиянинг янги бош вазирига айланди. Ундан аввалги ҳукумат раҳбари, партия ичидаги курашлар натижасида истеъфога чиққан Борис Жонсон жамоатчилик орасида Украинани қўллаб-қувватловчи энг фаол дунё етакчиларидан бири эди ва у уруш даврида Киевга бир неча марта борган эди.

Июль охирида Британия ташқи ишлар вазири лавозимида ишлаб юрган Лиз Трасс бош вазир этиб сайланса, у биринчи бўлиб Украина президенти Владимир Зеленскийга қўнғироқ қилиб, ўз қўллаб-қувватловини билдиришини маълум қилган эди. Ва шундай бўлди ҳам: Зеленский Лиз Трасс Буюк Британия бош вазири лавозимида мулоқот қилган биринчи чет эл етакчисига айланди.

Трасс Зеленскийга у «тўлиқ қўллаб-қувватланиши»ни, Украина эса узоқ муддатли истиқболда Буюк Британиянинг кўмагига умид қилиши мумкинлигини тасдиқлаган. Шунингдек, Трасс Зеленскийнинг Украинага ташриф буюриш таклифини қабул қилган.