SpaceX компаниясининг сунъий йўлдош интернет тармоғи энди Ер сайёрасининг барча қитъаларида мавжуд, бу ҳақда компания асосчиси Илон Маск маълум қилди, деб ёзади «РБК».
«Starlink тармоғи энди барча қитъаларда, шу жумладан, Антарктикада ҳам ишга тушди», — деб ёзди у Twitter’да.
Бир кун аввал SpaceX 54 та Starlink сунъий йўлдошидан иборат навбатдаги партияни орбитага чиқарди, бу йил бошидан буён қурилмаларнинг олтинчи марта учирилиши бўлди. Фазога олиб чиқилган қурилмаларнинг умумий сони 3 мингдан ошади.
Starlink сайтидаги харитага кўра, ҳозир интернет тармоғи Шимолий Америка, Европа, Австралия, Бразилия ва яна бир нечта мамлакатлар ҳудудларида ишлаяпти. Қолган давлатларда тармоқ фаолиятининг бошланиши келаси йилга белгиланган ёки ҳали аниқ эмас. Бундай белгилар Антарктика ҳудудларида ҳам турибди.
Starlink — юқори тезликли интернетдан глобал фойдаланишни таъминлаш мақсадидаги сунъий йўлдошлар тизимини яратиш лойиҳаси. Сунъий йўлдошлар 550 км баландликдаги орбитага жойлаштирилмоқда, компания 2020 йиллар ўрталаригача шундай қурилмалардан қаройб 12 мингтасини коинотга чиқаришни режалаштирмоқда.
Россия ҳарбий операцияси бошланганидан кейин Starlink интернетидан фойдаланиш учун ускуналар Украина ҳукуматига ҳам тақдим этилди, ундан, шу жумладан, ҳарбий ва фуқаролик маъмуриятлари ҳам фойдаланмоқда.
Изоҳ (0)