18 сентябрь, якшанба куни Ереван марказидаги Озодлик майдонида митинг бўлиб ўтди, унда иштирокчилар Арманистоннинг Коллектив хавфсизлик шартномаси ташкилотидан (КХШТ) чиқишини талаб қилди. Бу ҳақда Deutsche Welle хабар бермоқда.
ОАВ ҳисоб-китобларига кўра, митингга бир неча юздан бир неча минггача одам йиғилган. Митинг АҚШ Конгресси Вакиллар палатаси спикери Нэнси Пелосининг Ереванга ташрифи фонида бўлиб ўтди.
Акцияларда, хусусан, Арманистон Европа партиясининг раиси Тигран Хзмалян бошчилигидаги вакиллари иштирок этди. Унинг сўзларига кўра, Россия ва Туркия «арманларга қарши шартнома» имзолаган, оқибатда Тоғли Қорабоғ бой берилган.
«Агар биз КХШТ ва Евросиё иқтисодий иттифоқини тарк этсак, НАТО ва Европа Иттифоқига кирсак, унда йўқотилган ерларимизни қайтариб берамиз», — деди сиёсатчи.
Намойишчиларнинг айтишича, Арманистон КХШТдан чиқса, Ғарбдан ҳарбий ёрдам олиши мумкин.
Нэнси Пелоси 17 сентябрь куни Озарбайжон билан чегарадаги можаро авж олган бир пайтда Арманистонга келган эди. У АҚШнинг Арманистон хавфсизлиги ва демократиясини қўллаб-қувватлашига ишонтирди. Бош вазир Никол Пашинян билан учрашувда Пелоси АҚШ Тоғли Қорабоғ масаласида Арманистоннинг дўсти эканини айтди.
«Арманистонда демократияни тарғиб қилиш, арманлар геноцидини тан олиш тўғрисидаги резолюция, Тоғли Қорабоғ масаласида Туркияга қаршилик кўрсатиш ва барча масалаларда биз Арманистон билан дўстмиз. Ҳукуматингизни ҳурмат қилганимиз учун шу ердамиз», — деди спикер.
19 сентябрь кунги брифингда Пелоси «Озарбайжоннинг ҳалокатли зарбалари»ни қоралади ва буни Арманистон суверенитетига ҳужум деб атади. Озарбайжон Ташқи ишлар вазирлиги эса ушбу баёнотларни асоссиз ва адолатсиз деб атади.
Изоҳ (0)