Хитой–Қирғизистон–Ўзбекистон–Афғонистон мултимодал йўлагини ривожлантириш мақсадида Қошғар–Ўш–Андижон–Ғалаба–Ҳайратон янги транзит йўналиши бўйлаб контейнер поездини синов тариқасида ишга тушириш бошланди. Бу ҳақда Транспорт вазирлиги ахборот хизмати хабар берди.
Таъкидланишича, айни пайтда мазкур йўналиш бўйича 12 дона 40 футлик контейнердан иборат биринчи поезд Ўзбекистон ҳудуди орқали йўлга чиқмоқда.
Хитой–Қирғизистон–Ўзбекистон–Афғонистон янги мултимодал йўлаги бўйлаб юк ташиш Қошғар (Хитой) темир йўл станциясидан Ўш (Қирғизистон) темир йўл станциясига автомобиль орқали, сўнгра «Мозори Шариф» (Афғонистон) станциясигача Ўзбекистон ҳудудидан темир йўл орқали амалга оширилади.
Маълумот учун, Ўзбекистон ўз ҳудуди орқали ташув жараёнида 70 фоизли чегирма тақдим этган. Бошқа иштирокчи давлатлар томонидан 50 фоизгача бўлган тариф имтиёзлари берилган.
Мавзуга доир: Тошкентда Афғонистонга юк ташишни жадаллаштириш бўйича тўрт томонлама учрашув бўлиб ўтди
Изоҳ (0)