Ўзбекистон ва Испания сув хўжалиги соҳасида қўшма лойиҳаларни амалга оширади

Жаҳон банкининг «Фарғона водийсида сув ресурсларини бошқариш. 2-босқич» лойиҳасини амалга ошириш доирасида сув хўжалиги қонунчилиги, сув ресурсларини бошқариш, ташкилий, институционал, ҳуқуқий тузилмалар, сув ресурсларини молиявий-иқтисодий қўллаб-қувватлаш механизмини ўрганиш мақсадида Ўзбекистон делегацияси амалий сафар билан Испанияда бўлди, деб хабар бермоқда «Дунё» ахборот агентлиги.

Қайд этилишича, Ўзбекистон дипломатия ваколатхонаси кўмагида ташкил этилган ушбу сафар доирасида элчихонада делегация аъзолари Испаниянинг «Гедепса С.А.» промоутерлик ва консалтинг компанияси вакиллари билан учрашган.

Ушбу компания 1982 йилда Мадридда ташкил этилган бўлиб, Венгрия, Чехия, Қозоғистон, Арманистон, Грузия ва Ўзбекистонда ўз ваколатхоналарига эга. Компания ваколатхонаси томонидан Ўзбекистонда Испаниянинг сув-экология, саноат, қишлоқ хўжалиги ва таълим соҳаларида фаолият юритувчи йирик компаниялари таълим ва илмий муассасаларни жалб қилган ҳолда лойиҳаларни ҳаётга тадбиқ этади.

Тадбирда Испания томони Ўзбекистон делегациясини ўз мамлакатида сув ресурсларининг бошқарилиши бўйича тақдимот ўтказгани баробарида мамлакатда Испаниянинг «Аеcо» ва «Инима» каби етакчи компаниялари билан ҳамкорликда амалга ошириладиган сув ресурсларини бошқариш лойиҳаси билан таништирган.

Учрашув якунлари бўйича Сув хўжалигида хорижий инвестиция лойиҳаларини амалга ошириш маркази директори Бахтиёр Камолов ва  «Гедепса С.А.» президенти Алхандро Пастрана Молеро Ҳамкорлик меморандумини имзолаган.

Ҳужжатда сув таъминотининг самарали тизимларини яратиш, сув ресурсларини истеъмол қилиш ва улардан фойдаланиш самарадорлигини ошириш, сув хўжалиги соҳасида муқобил энергия ресурсларидан фойдаланишнинг инновацион технологияларини жорий этишга қаратилган қўшма инвестиция лойиҳаларини ишлаб чиқиш, шунингдек, уларни амалга ошириш учун Испаниянинг давлат ва хусусий маблағларини жалб этиш вазифалари белгиланган.