Ўзбекистоннинг Беларусдаги элчихонаси томонидан Навоий вилояти Зарафшон шаҳар ҳокими Назирбек Раҳмонов ва «Сифания-экотехника» хусусий корхонаси директори Александр Соболевский ўртасида Зарафшон шаҳрида маиший чиқиндиларни қайта ишлаш бўйича ҳамкорликни ривожлантириш борасида видеоконференция учрашуви ташкил этилди. Бу ҳақда «Дунё» ахборот агентлиги хабар қилди.
Қайд этилишича, Зарафшон шаҳар ҳокими ўз сўзида бугунги кунда шаҳарда чиқиндиларни қайта ишлаш соҳасида амалга оширилаётган ишлар ва бу борадаги масалалар билан иштирокчиларни таништирган. Ушбу йўналишда мавжуд имкониятлар тўғрисида ахборот берган.
«Сифания-экотехника» хусусий корхонаси вакиллари чиқиндиларни қайта ишлаш бўйича юқори тажрибага эга экани, бугунги кунда корхона томонидан ишлаб чиқарилаётган ускуналар маиший чиқиндиларни 70 фоизгача чуқур қайта ишлаш имкониятини бериши тўғрисида ва корхона 17 та мамлакатда ўз ускуналарини ўрнатиб, фаолият юритиб келаётганини билдирган.
Видеомулоқот якунида «Сифания-экотехника» хусусий корхонаси вакилларидан иборат ишчи гуруҳ шу йил якунига қадар Зарафшон шаҳрига амалий ташриф буюришини ва юқорида қайд этилган йўналишда ҳамкорликни ривожлантириш истагини билдирган.
Изоҳ (0)