Ўзбекистоннинг Япониядаги элчихонаси томонидан Япониянинг Эхиме префектурасида Ўзбекистоннинг савдо-иқтисодий, сайёҳлик ва сармоявий салоҳияти тақдимоти бўлиб ўтди. Бу ҳақда «Дунё» агентлигига таяниб, EastFruit хабар бермоқда.
Тадбирда Японияда фаолият юритаётган ташкилот ва компания вакиллари иштирок этди.
Бир қатор компаниялар аниқ йўналишлар, жумладан, Ўзбекистонда соуслар ва зираворлар ишлаб чиқариш учун аччиқ ўсимликлар сотиб олиш бўйича ҳамкорликка қизиқиш билдирган.
Ўзбекистонлик дипломатларнинг Эхиме префектурасига ишчи сафари доирасида Япониянинг энг муваффақиятли озиқ-овқат компанияларидан бири, Япониядаги соуслар ва зираворлар ишлаб чиқарувчи йирик компания раҳбари бўлган «Ниҳон Шоккен» компанияси президенти Озава Казухико билан музокаралар ўтказилди. Компаниянинг йиллик даромади 1 миллиард доллардан ошади.
Япония компанияси президенти соуслар тайёрлашда фойдаланиш учун Ўзбекистондан энг юқори сифатли зираворлар, шунингдек, миллий ҳунармандчилик ва халқ амалий санъати маҳсулотларини олиб киришга қизиқиш билдирди.
Музокаралар якунлари бўйича Ўзбекистонда япон ташкилот ва компаниялари вакиллари билан алоҳида икки томонлама учрашувлар ўтказиш келишиб олинган.
Аввалроқ Ўзбекистон Беларусга қуритилган сабзавот ва мевалар етказиб бераиши ҳақида хабар берилган эди.
Изоҳ (0)