Боку Арманистон билан сўнгги можарода 71 нафар озарбайжонлик ҳарбий ҳалок бўлганини маълум қилди

Арманистон ва Озарбайжон чегарасида юз берган сўнгги можарода жами 71 нафар озарбайжонлик ҳарбий хизматчи ҳалок бўлди, дея хабар беради Озарбайжон Мудофаа вазирлиги. 13 сентябрда вазирлик қурбонлар сони 50 нафар экани ҳақида маълум қилганди.

13 сентябрь куни эълон қилинган рўйхатга кўра, Арманистон чегарасидаги тўқнашувларда ҳалок бўлган 50 озарбайжонликдан 42 нафари армия аскарлари, 8 нафари эса чегарачилар бўлган.

Ереван ва Баку ўртасида навбатдаги кескинлик 12 сентябрдан 13 сентябрга ўтар кечаси бошланди. Арманистон Озарбайжонни жануби-шарқий чегарани ўққа тутишда айблади. Ўз навбатида, Боку ҳам Арманистон томондан Озарбайжон армиясининг таъминот йўллари миналангани, шунингдек, ўт очилганини даъво қилди.

13 сентябрь тонгида томонлар Москва воситачилигида ўт очишни тўхтатишга келишди, аммо отишмалар тўхтамади ва икки мамлакат ҳам бунда қарши тарафни айблади. 14 сентябрь оқшомида томонлар тинчлик бўйича яна бир бор келишувга эришди. 15 сентябрь тонгида Ереван Озарбайжон билан чегарада ҳеч қандай тўқнашув қайд этилмагани ҳақида маълум қилди.

14 сентябрь куни тушдан кейин Арманистон бош вазири Никол Пашинян парламентда мамлакат учун «мустаҳкам тинчлик ва хавфсизлик»ни кафолатлайдиган ҳужжатни имзолаш режаси ҳақида маълум қилганди. Шундан сўнг Ереванда норозилик намойишлари бошланди. Кейинроқ Пашинян унинг сўзлари нотўғри талқин қилингани ва шу пайтгача Боку билан ҳеч қандай ҳужжат имзоланмаганини айтди.

Ереван Озарбайжон билан зиддиятни ҳал қилишда ёрдам сўраб Коллектив Хавфсизлик Шартномаси Ташкилотига мурожаат қилган эди. 15 сентябрь куни КХШТ вазиятни баҳолаш учун эскалация зонасига ўз миссиясини юборади.

КХШТ Бирлашган штаби раҳбари Анатолий Сидоровнинг айтишича, ташкилот ҳозирча жанговар ҳудудга ҳарбий контингент юбориш имкониятини кўриб чиқмаяпти. Унинг таъкидлашича, КХШТнинг махсус миссияси вазиятни баҳолайди ва ташкилотга аъзо мамлакатлар раҳбарларига вазиятни ҳал қилишнинг эҳтимолий вариантларини тақдим этади.

«Аммо ҳозирча минтақага ҳарбий хизматчилар жўнатиш ҳақида гап йўқ», — деди Сидоров.

Озарбайжон президенти Илҳом Алиев, ўз навбатида, Озарбайжон Қуролли кучлари раҳбарияти билан тезкор йиғилиш ўтказди ва зиддиятнинг кучайишида Арманистонни айблади. 15 сентябрь куни Озарбайжон мудофаа вазири Зокир Ҳасанов туркиялик ҳамкасби Ҳулуси Акар билан чегарадаги вазият ҳақида гаплашди. Анқара бу можарода Бокуни қўллаб-қувватламоқда ва Ереванни «нотўғри йўлдан қайтишга» чақирмоқда.