«Кремль томонидан ҳарбий ҳолат эълон қилинишини кутиб ўтириш керак эмас». Қодиров ҳудудлар раҳбарларини урушга минг нафардан кўнгиллилар юборишга чақирди

Чеченистон раҳбари Рамзан Қодиров Россия минтақалари раҳбарлари «мустақил сафарбарлик» эълон қилиши ва Украинадаги урушга юбориш учун кўнгиллиларни тайёрлаши кераклигини айтди, деб ёзади Meduza.

«Кремль томонидан ҳарбий ҳолат эълон қилинишини кутиш ёки, аксинча, Украинада махсус ҳарбий операция тугашини кутиб бекиниб ўтириш керак эмас. Россиянинг ҳар битта субъекти раҳбари бугун давлатга ёрдам беришга шайлигини исботлаши керак», — деб ёзди Қодиров Telegram-каналида.

Чеченистон раҳбари фикрича, «минтақаларнинг ҳар бир раҳбари ҳеч бўлмаганда бир минг нафар кўнгиллини тайёрлаш, ўқитиш ва аслаҳа билан таъминлашга бемалол қурби етади». «Давлат кўламида бу 85 минг кишилик каттагина ҳарбий контингент — деярли армия!» — деб ёзди Қодиров ва бу энг қисқа муддатда махсус операция вазифаларини ҳал қилиш имкониятини беришини қўшиб қўйди.

Рамзан Қодиров 14 сентябрь куни Россия ҳудудларини мустақил равишда сафарбарлик эълон қилишга чақирганди, аммо ўшанда қанча сонли кўнгиллиларни жалб қилиш зарур деб ҳисоблашига аниқлик киритмаган эди. Чеченистон раҳбари, шунингдек, Россияда ҳарбий ҳолат эълон қилиниши зарурлигини айтганди.

Аввалроқ КPRФ (Россия Федерацияси Коммунистик партияси) етакчиси Геннадий Зюганов Россия Давлат думаси кузги сессиясининг биринчи ялпи мажлисида нутқ сўзлаб, Украинадаги «махсус операция» тўла-тўкис урушга айланиб кетганини маълум қилган эди. КPRФ етакчиси қайд этишича, Дума сессияси ҳали ҳеч «бундай мураккаб ва кескин вазият»да очилмаган. Унинг сўзларига кўра, Давлат думаси таътилда ўтказган икки ой ичида вазият, шу жумладан, фронтдаги ҳолат ҳам «тубдан» ўзгарган. «Лекин ҳар қандай уруш жавобни талаб қилади. Аввало, кучлар ва ресурслар максимал даражада сафарбар этилиши керак. Жамият жипслашиши ва асосий бирламчи вазифалар аниқлаб олиниши керак», — дея қўшиб қўйди сиёсатчи.

Россия президенти матбуот котиби Дмитрий Песков ва Россия ҳукуматининг бошқа вакиллари даъво қилишича, сафарбарлик эълон қилиш режалаштирилмаяпти.

Июль ойида манбалар Россия ҳукумати умумий сафарбарлик эълон қилиш ўрнига, ҳудудлар раҳбариятига камида биттадан кўнгиллилар батальонини йиғиб беришни топширганини маълум қилганди. Август боши ҳолатига, «Коммерсантъ» маълумотларига кўра, 20 дан ортиқ минтақада (шу жумладан, Москвада) кўнгиллилар батальонлари тузилган. Россия қўшинларида батальонлар таркиби 150 дан 500 нафаргача кишини ташкил қилади.