Жанубий Корея полицияси 42 ёшли аёлни қўлга олди, у ўзининг икки фарзандини ўлдирганликда гумонланмоқда. Болаларнинг жасадлари августда Янги Зеландиядаги кимошди савдосида сотилган иккита чамадон ичидан чиққан, деб ёзади Meduza.
Келиб чиқиши кореялик бўлган янги зеландиялик аёл Улсан шаҳрида 15 сентябрга ўтар кечаси ушланган. Полиция маълум қилишича, 2018 йил июлида гумонланувчи, тергов версиясига кўра, Оклендда етти ва тўққиз ёшли фарзандларини ўлдирганидан кейин Янги Зеландиядан Жанубий Кореяга қочган. У Янги Зеландия полицияси сўрови билан қўлга олинган, энди аёлни расман экстрадиция қилишни талаб этиш учун уларда 45 кун вақт бор.
Полициячилар гумонланувчини Сеулга олиб кетиш учун Улсандаги полиция участкасидан олиб чиқаётганида у юзини курткасининг капюшони билан ёпиб олди ва журналистларга қотилликларга алоқадор эмаслигини маълум қилиб: «Буни мен қилмадим», — деди.
Окленд ташқарисидаги Манурева шаҳарчасида яшовчи оила ташлаб кетилган буюмлардан иборат контейнер савдога қўйилган онлайн-аукционда чамадонларни сотиб олганидан кейин, Янги Зеландия полицияси қўш қотиллик бўйича суриштирув бошлади. Чамадонлар бошқа харидлар билан бирга, оиланинг уйига етказиб берилган, шундан кейин 11 август куни уларнинг ичидан икки ёш боланинг жасадлари чиққан. Янги Зеландия полицияси фикрича, чамадонлар сотувга қўйилишидан аввал Папатоэтоэ Сафе Сторе омборхонасида уч-тўрт йил мобайнида сақланган. Жасадларни топиб олган оила болаларнинг ўлимига алоқадор эмас, деб ҳисоблайди полиция.
Янги Зеландия полицияси аввалроқ болаларнинг қариндоши 2018 йилда мамлакатни тарк этиб, бошқа қайтиб келмаганини маълум қилганди. Айни вақтда болаларнинг Янги Зеландияда яшайдиган қариндошларини топишга муваффақ бўлишди (баъзи маълумотларга кўра, улар болаларнинг бувиси ва бобосидир).
Август охирида полиция ўлдирилган болаларнинг жасадлари шахсини аниқлаган, бироқ уларнинг исмларини ошкор қилмаганди. Маҳаллий газеталарга кўра, улар 2009 ва 2012 йилда туғилган қиз ва ўғил бола. Уларнинг жинси ва туғилган йили расман маълум қилинмаган. ОАВлар даъво қилишича, болаларнинг отаси уларнинг ўлимидан аввал онкологик касалликдан вафот этган.
Изоҳ (0)