Коллектив хавфсизлик шартномаси ташкилоти (КХШТ — Арманистон, Беларусь, Қозоғистон, Қирғизистон, Россия ва Тожикистон киради) сайти DDoS-ҳужумга учради, деб ёзади Meduza ташкилот Telegram-каналига таяниб.
КХШТ баёнотига кўра, ҳужум 13 сентябрь куни ярим тунга яқин бошланган. Натижада «ресурс иш қобилияти бузилган, баъзи ахборот хабарларига ўзгартиришлар киритиш бўйича ноқонуний уринишлар қайд этилган». Ташкилот таъкидлашича, 14 сентябрь эрталабгача сайтга кириш имконияти бўлмаган.
«Айни пайтда сайт фаолияти қисман қайта тикланган, ноқонуний аралашув кенгайишига йўл қўймаслик ва зарар етган ёки йўқотилган маълумотларни тиклаш бўйича чора-тадбирлар олиб борилмоқда», — дейилади хабарда.
13 сентябрга ўтар кечаси Арманистон-Озарбайжон чегарасида жанговар ҳаракатлар қайта бошланди, шу муносабат билан Арманистон КХШТга аъзо мамлакатларга ёрдам сўраб мурожаат қилди. Ташкилотдагилар куч қўллашни номақбул деб ҳисоблашини маълум қилди ва «зиддиятларни сиёсий-дипломатик усуллар ёрдамида ҳал қилишга чақирди». Кейинроқ КХШТ «юзага келган вазиятга баҳо бериш» учун Арманистонга ўз миссиясини юборишга қарор қилди.
Изоҳ (0)