Бир неча асрлар олдин Британия монархлари мамлакат устидан мутлақ ҳукмронлик қилган, бу кўпинча империя таркибидаги субъектлар зарарига ишлаган. Бугунги даврга келиб, 2022 йилда қирол ёки қиролича қандай қудратга эга?
Мутахассисларнинг таъкидлашича, монархия билан боғлиқ дабдаба — муҳташам саройлардан тортиб ялтироқ тожларгача ҳамон ўз ўрнида қолмоқда, аммо аслида уларнинг роли асосан расмиятчиликдан иборат. Шу билан бирга қироллик оиласининг таъсирини камайтиришга уринишлар давом этмоқда.
8 сентябрь куни вафот этган онаси — қиролича Елизавета II нинг ўрнига тахтга ўтирган қирол Чарльз III нинг ваколатлари тобора қисқариши мумкин.
Қирол Чарльз III ҳам онаси сингари мамлакатни бошқармайди. У фармон ёки шунга ўхшаш нарсаларни чиқара олмайди. Аксинча, унга хулқ-атворида зодагонларга хос одоб ва тавозени акс эттирувчи фигура сифатида қаралади.
Монарх бугунги кунда ҳам Англия черкови ва Қуролли кучларининг расмий раҳбари ҳисобланади. «Royal.uk» қироллик расмий веб-сайтида таърифланганидек, монархнинг асосий вазифаси Британия тарихида 1000 йил давомида ишлаб чиқилган конституциявий ва вакиллик вазифаларини ўз зиммасига олишдир. Қисқача айтганда, бу кўплаб маросимларда лента қирқишни англатади.
Қиролича Елизавета II 70 йиллик ҳукмронлиги даврида монархия дуч келган можароларнинг аҳамияти катта бўлди. Мутахассисларнинг таъкидлашича, шахсий жанжаллар ва монархиянинг мақсадини шубҳа остига қўядиган қарашлар қирол Чарльз III даврида вазиятни янада чигаллаштириши мумкин, бу эса, қиролнинг ўзи ва унинг меросхўри шаҳзода Уильямнинг асосий мажбуриятларини чеклайди.
«Тожни ифодаловчи гуруҳ вакиллари камайиши мумкин, бунинг ижобий ва салбий томонлари бўлади», — дейди Торонто университети тарихчиси Керолин Харрис.Харриснинг тахминига кўра, салбий томони қироллик вакилларининг монархия таркибидаги мамлакатларига ташрифи камроқ ва қисқароқ бўлади, бу эса кўп халқларнинг республикага айланишига олиб келиши мумкин.
«Ижобий томони мамлакатга вакиллик қилаётган одамлар ва қироллик оиласига алоқадор бўлганлар ўртасида йўғонроқ чизиқ тортилади», — дейди Харрис. Унинг айтишича, қиролича Елизавета Британиядан бошқа давлатларга сафари чоғида тадбирларда ёрдам бериш учун кўплаб қариндошларини ўзи билан олиб юрган.
Изоҳ (0)