Австралия ғарбида 77 ёшли қария ёввойи кенгуру қурбонига айланди, деб ёзади USA Today.
Ҳодиса Перт шаҳридан 399 км жануби-шарқда жойлашган Редмонд аҳоли пунктида юз берди. Жабрланувчини унинг қариндошларидан бири топиб олган.
Терговчилар талқинига кўра, кенгуруни қурбоннинг ўзи уй ҳайвони сифатида сақлаб келган, аммо бир кун келиб, унга ҳужум қилган. Қариндоши тез ёрдам чақирган.
Аммо қотил кенгуру полициячиларни ҳам, тиббиёт ходимларини ҳам жабрланувчига яқинлаштирмаган, шундан кейин полиция жониворни отиб ташлаган.
Кенгуру тўсқинлик қилиши оқибатида тиббий ёрдам вақтида кўрсатилмагани ҳам қариянинг вафоти сабабларидан бири бўлди. Аммо расмий сабаблар эълон қилинганича йўқ.
Австралияда кенгуру одамни ўлдириши билан боғлиқ ҳолат сўнгги марта 1936 йилда қайд этилган. Ўшанда Австралиянинг Янги Жанубий Уэльс штатида 38 ёшли эркак кенгуру ҳужумига учрагач, орадан бир неча ой ўтиб, касалхонада вафот этган эди.
Мавзуга доир:
- Тўрт оёқда ҳаракатланаётган кенгуру видеоси интернет фойдаланувчиларининг қўрқувига сабаб бўлди
- Рига ҳайвонот боғига ташриф буюрувчилар орқаси билан иссиқ полда ётган кенгурунинг соғлиғидан хавотирланиб, полиция чақирди
- Кенгуру инсонларга ўзига ёрдам кераклигини тушунтира олади. Сиз буни унинг кўзларидан англайсиз (видео)
Изоҳ (0)