Бирлашган Миллатлар Ташкилоти Бош Ассамблеясининг 13 сентябрь куни очиладиган 77-сессияси раиси Чаба Короши БМТни ислоҳ қилишни давом эттириш тарафдори эканини айтди ва Бош Ассамблея фаолиятини «кўпроқ натижа олишга йўналтиришни» ваъда қилди.
«Биз БМТни, жумладан, Бош Ассамблеяни ислоҳ қилиш ва ўзгартиришни давом эттиришимиз ҳамда ишонч орқали ҳамкорлигимизни мустаҳкамлашимиз керак. Менинг раҳбарлигим шиори шундай бўлади: ‘Бирдамлик, барқарорлик ва илм-фан орқали ечимлар», — деди Короши.
Унинг сўзларига кўра, бўлажак сессиянинг асосий мавзуси «Бир-бирига боғлиқ муаммолар учун инқилобий ечимлар» бўлади.
БМТ низомига мувофиқ 1945 йилда ташкил этилган БМТ Бош Ассамблеяси ташкилотда марказий ўринни эгаллаб, асосий маслаҳатчи, йўл-йўриқ кўрсатувчи ва вакиллик органи ҳисобланади.
БМТ Низомига мувофиқ Бош Ассамблея:
- Хавфсизлик Кенгашининг тавсиясига биноан БМТ Бош котибини тайинлайди;
- Хавфсизлик Кенгашининг доимий бўлмаган аъзоларини ва БМТнинг бошқа кенгашлари ва органлари аъзоларини сайлайди;
- БМТ бюджетини кўриб чиқади ва тасдиқлайди ҳамда ташкилотга аъзо давлатлардан олинадиган молиявий бадаллар миқдорини белгилайди.
БМТ Бош Ассамблеясининг 77-сессияси 20—26 сентябрь кунлари Нью-Йоркда бўлиб ўтади. Бу йил йиғилиш офлайн тарзда ўтказилади, аввалги икки йилда COVID-19 пандемияси туфайли айрим чиқишлар видеомулоқот шаклида бўлган.
Изоҳ (0)