Дунё бўйлаб 50 миллионга яқин одам замонавий қулликда, дея маълум қилди Халқаро меҳнат ташкилоти.
Бирлашган Миллатлар Ташкилотининг икки агентлиги — Халқаро меҳнат ташкилоти ва Халқаро миграция ташкилотининг Walk Free Foundation билан биргаликда олиб борган тадқиқоти шуни кўрсатдики, сўнгги 5 йил ичида қулликдаги одамлар сони сезиларли даражада ошган ва бу тахминан 50 миллион кишини ташкил этмоқда. Уларнинг 28 миллиони мажбурий меҳнатга жалб қилинган, 22 миллиони эса мажбурий никоҳда яшмоқда.
Ҳисоботда таърифланганидек, замонавий қуллик икки асосий компонент — мажбурий меҳнат ва мажбурий никоҳдан иборат. Иккаласи ҳам таҳдид, зўравонлик, мажбурлаш, алдаш кабилар билан одамларни эксплуатация қилишни назарда тутади.
Қайд этилишича, қулликда бўлганлар сони 2016—2021 йиллар оралиғида 10 миллионга ошган. Бунга иқлим ўзгариши ва коронавирус пандемияси ҳам таъсир қилган. Аёллар ва болалар номутаносиб равишда ҳимоясизлигича қолмоқда.
«Замонавий қуллик ҳолати яхшиланмаётгани одамни даҳшатда солади. Инсон ҳуқуқларининг бу тарзда бузилишини ҳеч нарса билан оқлаб бўлмайди. Самарали миллий сиёсат ва тартибга солиш асосий аҳамиятга эга. Аммо ҳукуматлар буни ёлғиз уддалай олмайди. Халқаро стандартлар мустаҳкам пойдевор яратмоқда ва бунга комплекс ёндашув ҳам зарур. Касаба уюшмалари, иш берувчи ташкилотлар, фуқаролик жамияти ва оддий одамлар бу жараёнда муҳим рол ўйнаши керак», — дейди Халқаро меҳнат ташкилоти раҳбари Гай Райдер.
Тадқиқот шуни кўрсатадики, замонавий қуллик дунёнинг деярли барча мамлакатларида учрайди ва этник, маданий ва диний чегараларни кесиб ўтади. Мажбурий меҳнатнинг ярмидан кўпи, мажбурий никоҳларнинг эса тўртдан бир қисми ўрта ёки юқори даромадли мамлакатларда кузатилмоқда.
БМТ маълумотларига кўра, мажбурий меҳнатга жалб қилинганларнинг ҳар саккиз нафардан бири, яъни 3,3 миллионга яқини болалар бўлиб, уларнинг ярмидан кўпи жинсий эксплуатацияга учраган.
Ҳисоботда замонавий қулликка чек қўйиш йўлида сезиларли ютуқларни кўрсатадиган бир қатор тавсиялар берилган: қонунлар ва меҳнат инспекциясини такомиллаштириш ва амалга ошириш; давлат томонидан мажбурий меҳнатга чек қўйиш; бизнес ва таъминот занжирларида мажбурий меҳнат ва одам савдосига қарши курашни кучайтириш; ижтимоий ҳимояни кенгайтириш ва ҳуқуқий ҳимояни кучайтириш, шу жумладан қонуний никоҳ ёшини истисносиз 18 ёшга етказиш.
Изоҳ (0)