Сентябрь ойи бошидан бери Украина армияси ўз ҳудудининг икки минг квадрат километрга яқин қисмини озод қилди. Бу ҳақда Украина президенти Владимир Зеленский 10 сентябрь куни кечки нутқида айтиб ўтди.
Аскарларимиз фронтнинг турли йўналишларида ҳаракатни давом эттирмоқда. Сентябрь ойи бошидан буён олиб борилган фаол амалиётлар доирасида бугунга қадар ҳудудимизнинг икки минг километрга яқин қисми озод қилинди. Россия армияси шу кунларда қўлидан келган энг яхши қобилиятини намойиш қилмоқда — орқасини кўрсатмоқда, — деди Зеленский.8 сентябрь куни Зеленский ой бошидан бери Украина ўз ҳудудининг минг квадрат километрдан ортиқ қисмини озод қилгани ҳақида айтганди. 9 сентябрь куни у Украина Қуролли кучлари Харьков вилоятидаги 30 дан ортиқ аҳоли пункти устидан назоратни тиклаганини эълон қилди.
Шу ҳафтада Украина Қуролли кучлари Харьков вилоятининг босиб олинган ҳудудларида қарши ҳужумга ўтди. 8 сентябрда рус қўшинлари қамал хавфи остида Балаклея шаҳрини, 10 сентябрда эса Купянск шаҳрининг ғарбий қисми ва Изюм шаҳрини тарк этди.
10 сентябрь куни Россия Мудофаа вазирлиги биринчи марта Харьков вилоятидаги чекинишни тасдиқлади. Вазирлик буни «Донецк йўналишидаги саъй-ҳаракатларни кучайтириш» учун «қўшинларни қайта йиғиш бўйича операция» деб атади.
Изоҳ (0)