11-sentabrga o‘tar kechasi Zaporojye AES ning so‘nggi — oltinchi energobloki elektr tarmog‘idan uzildi va sovuq holatga o‘tkazishga tayyorlana boshladi. Bu haqda Ukrainadagi barcha atom elektr stansiyalarini boshqaradigan “Energoatom” kompaniyasi xabarida aytiladi.
Kompaniyaning ta’kidlashicha, so‘nggi uch kun davomida oltinchi energiya bloki ZAESda o‘z ehtiyojlarini “o‘ta past quvvat darajasida” ta’minlab kelayotgandi. “Energoatam” buni “Rossiyaning o‘qqa tutishi oqibatida” stansiya Ukraina energetika tizimi bilan bog‘laydigan elektr tarmog‘idan uzilgani bilan izohladi.
10-sentabr oqshomida shikastlangan elektr uzatish liniyalaridan biri tiklangan va AES Ukraina energetika tizimiga qayta ulangan. “6-energoblokni o‘chirib, uni eng xavfsiz – sovuq holatga o‘tkazishga qaror qilindi”, — deyiladi “Energoatom” xabarida.
Rossiyaning “Rosenergoatom” konserni rahbari maslahatchisi Renat Karchaa ham 11-sentabrga o‘tar kechasi AESning oltinchi energiya bloki ishi to‘xtatilganini aytdi, deb yozadi “Interfaks”.
Ukraina va Yevropadagi eng yirik atom elektr stansiyasi bo‘lgan Zaporojye AES Rossiya qo‘shinlari tomonidan bosib olingan Zaporojye viloyatining Energodar shahrida joylashgan. Ukraina va Rossiya bir necha bor bir-birini stansiyani o‘qqa tutishda ayblagan.
Izoh (0)