Австралия ва Янги Зеландияда Чарльз III расман қирол деб эълон қилинди. Бу ҳақда ушбу мамлакатлар матбуотига таяниб, «Интерфакс» хабар берди.
Австралиянинг ABC телерадиокомпанияси хабар беришича, генерал-губернатор Дэвид Херли қирол Чарльз III ни расман Австралиянинг ҳукмрон монархи деб эълон қилди. Унинг баёнотида қайд этилишича, қиролича Елизавета II вафотидан сўнг «тож тўлиқ ва ҳақли равишда» унинг ўғли Чарльзга ўтган.
«Биз чин юракдан ва камтарин севги билан унга ишонч ва садоқатни ваъда қиламиз», — дея қўшимча қилди генерал-губернатор.
Чарльз III нинг Янги Зеландия қироли деб расман эълон қилиниши мамлакат парламентида бўлиб ўтган.
«Янги зеландияликларнинг аксарияти учун у (қиролича Елизавета II) биз билган ягона монарх эди, шунинг учун унинг ўлимидан сўнг биз ўзгаришлар даврига киряпмиз», — деди Янги Зеландия бош вазири Жасинда Ардерн.
Аввалроқ Лондонда Британия янги қиролининг тахтга ўтириш маросими бўлиб ўтганди. Ворислик кенгаши Чарльз III ни расман Буюк Британия қироли деб эълон қилган.
Қиролича Елизавета II 96 ёшида Шотландиядаги Balmoral қасрида вафот этди. Унгача шифокорлар унинг саломатлиги юзасидан хавотир билдириб, унга кузатув остида қолишни тавсия этган эди.
Унинг ўғли, 73 ёшли шаҳзода Чарльз ўз-ўзидан қиролга айланди ва Чарльз III номини олди.
Изоҳ (0)