Россия Украинага қурол етказиб берилиши бўйича БМТ Хавфсизлик кенгаши йиғилишини ўтказишни талаб қилди

Россия 8 сентябрь куни Украинага чет эл қурол-яроғлари етказиб берилиши масаласи бўйича БМТ Хавфсизлик кенгаши мажлисини ўтказиш ҳақида сўров киритди, деб ёзади «РБК» Россиянинг ташкилотдаги доимий вакили Василий Небензяга таяниб.

«Эртага (8 сентябрь) Украинага хорижий мамлакатлар томонидан қурол-яроғ ва ҳарбий хусусиятга эга маҳсулотлар етказиб берилиши ортидан халқаро тинчлик ва хавфсизликка нисбатан юзага келаётган ҳақиқий хавфларни муҳокама қилишни таклиф этамиз», — деди у 7 сентябрь куни.

Небензя қўшимча қилишича, Россия томони маърузачи сифатида БМТ бош котибининг қуролсизланиш масалалари бўйича ўринбосари Идзуми Накамицу ва фуқаролик жамияти вакилларини кўришни истарди.

Кейинроқ Россиянинг БМТдаги доимий вакили биринчи ўринбосари Дмитрий Полянский ўз Telegram-каналида Хавфсизлик кенгашидаги Ғарб дипломатлари Россиянинг Киевга қурол етказилиши муаммоси бўйича мажлис ўтказиш сўровидан «мамнун бўлгани» ҳақида истеҳзоли пост қолдирди.

«Ҳамкасбларимиз учун тўқиб чиқарилган ‘фильтрация’ни эмас, ҳақиқий муаммоларни муҳокама қилиш вақти келди. Бизнинг сюрпризимиз уларни қувонтиргани юзларидан билиниб турганди», — дея қўшиб қўйди дипломат.

Аввалроқ АҚШ ва Албания БМТ Хавфсизлик кенгашидан 7 сентябрь куни кечқурун мажлис ўтказишни сўраб, Россия ҳудудида украинларнинг «фильтрация қилиниши»ни муҳокама этишни талаб қилган эди.

АҚШ ва Евроиттифоқ мамлакатлари Россия ҳарбий операцияси бошланганидан кейин Украинага қурол-яроғ, шу жумладан, HIMARS баравар ўт очиш реактив тизимлари, Javelin ва NLAW танкка қарши мажмуалари, Stinger ҳаво ҳужумига қарши мажмуаларини етказиб беришни кучайтирди.

Россия Ғарб қурол етказиб бериш орқали фақат зиддиятнинг чўзилишига имконият яратаётганини бир неча марта таъкидлаган. Киевга узоқ масофали қурол-яроғ тақдим этилиши махсус операция географиясининг кенгайишига олиб келади, дея огоҳлантирганди Россия ТИВ.