Туркия президенти Ражаб Тоййиб Эрдўғон ва Сербия президенти Александр Вучич Белграддаги матбуот анжуманида Ғарбнинг Россияга нисбатан сиёсатини қоралади, деб ёзади Meduza. Эрдўғон Ғарбнинг хатти-ҳаракатларини «томонларни гижгижлаш», Украинага юборилаётган қурол-яроғни эса «лаш-лушлар» деб атади.
«Ғарбнинг позиция хато деб очиқдан-очиқ айтаман. Чунки Ғарбнинг томонларни провокация қилишга асосланган хатти-ҳаракатлари яққол кўриниб турибди. Ҳарбий кўмак ҳақида эълон қилишяпти. Лекин факт бўйича, Ғарбда эскириб кетган қанча қурол ва металлолом бўлса, ҳаммасини Украинага жўнатишяпти, — деди Эрдўғон. Ҳозир сиз томонлардан бири ғалаба қозоняпти деб айта оласизми? Йўқ! Бу урушда ғолиблар йўқ, лекин мағлублар жуда кўп. Катта сонли одамлар ҳалок бўляпти, молиявий томони ҳақида гапириш эса ноўрин».
Эрдўғон, шунингдек, Европадаги энергия инқирозини тилга олди: «Россия газ етказиб беришни тўхтатди, Европада нархлар эса кўтарилиб кетди. Ҳозир Европа мамлакатларида қишки мавсумни енгиб ўтиш йўлларини биргаликда қидиришяпти. Нима учун бу ҳақда аввалроқ ўйламадингиз? Ахир Россиянинг қўлида муҳим ресурс турибди».
Александр Вучич, ўз навбатида, келаётган бир неча ой Евроиттифоқ мамлакатлари учун жуда мураккаб бўлишини айтди.
«Шу қиш барчамиз учун жуда совуқ бўлади, келаси йил эса бутун Европани қутб қиши кутмоқда. Ҳеч ким ечим қидиришни истамаяпти, ҳамма муросани эмас, душманнинг мағлубиятини кутяпти. Агар ҳақиқатан ҳам Россияни ҳарбий йўл билан осонгина енгиш мумкин деб ўйласангиз, унда ҳам совуқ, ҳам қутб қишига яхшилаб тайёрланишимиз керак бўлади», — деди Сербия президенти.
Аввалроқ Эрдўғон Россиядан газ етказиб беришнинг қисқариши туфайли келаётган қишда дуч келинадиган муаммоларга Европа давлатларининг фақатгина ўзлари айбдор бўлишини таъкидлаганди.
Изоҳ (0)