Bugun,

  • USD 10940.05
  • RUB 182.26
  • EUR 11121.65

Germaniya kansleri Olaf Shols AQSH prezidenti Jo Baydenning Ukrainaga Rossiya hududi bo‘ylab zarbalar uchun qo‘llanilishi mumkin bo‘lgan qurol-yarog‘lar yetkazib berishni taqiqlashga nisbatan pozitsiyasini qo‘llab-quvvatlashini ma’lum qildi, deb yozadi “RBK”.

Olaf Shols

Olaf Shols
Foto: Global Look Press

Magdeburgda nutq so‘zlash chog‘ida Shols Baydenning ushbu masala bo‘yicha gaplarini eslatdi va, uning fikricha, boshqa mamlakatlar ham shu pozitsiyaga amal qilishi kerakligini aytdi. “Biz hech qachon yolg‘iz harakat qilmaymiz, ammo doim ittifoqdoshlarimiz qilayotgan ishlardan mo‘ljal olamiz”, — deya qo‘shib qo‘ydi u.

G‘arb qurol-yarog‘larining Ukraina hukumati tomonidan Rossiya hududiga zarbalar berish uchun qo‘llanilishi ehtimoli haqidagi bahs-munozara bahorda boshlandi. Kiyev Rossiya armiyasi tomonidan zarbalarga javob qilish uchun bir necha marta Amerikaning HIMARS va MLRS  baravar o‘t ochish reaktiv tizimlarini yetkazib berishni so‘radi. Vashington esa Ukraina Qurolli kuchlari ulardan Rossiya hududini o‘qqa tutishi mumkinligidan xavfsirab, bunday qurollarni yetkazib berishdan bosh tortgandi.

Oxir-oqibat, AQSH prezidenti Jo Bayden Vashington Ukrainaga Rossiya hududiga yetib bora oladigan qurol-yarog‘larni taqdim etmasligini ma’lum qildi. Shuningdek, u AQSH yoki uning ittifoqdoshlari hujumga uchramagunicha, mamlakat nizoga bevosita qatnashmasligini ham aytdi.

HIMARS tizimlari baribir Ukrainaga jo‘natildi, biroq AQSH ular bilan birga taqdim etgan snaryadlar Rossiya hududiga xavf tug‘dirmaydigan uzoqlikka uchadi.

Rossiya tashqi ishlar vaziri Sergey Lavrov AQSHning pozitsiyasini oqilona deb hisobladi. Rossiya Xavfsizlik kengashi raisi o‘rinbosari Dmitriy Medvedev Rossiya shaharlariga hujum qilingan taqdirda, harbiylar “ushbu jinoiy qarorlarni qabul qilgan markazlar”ga zarbalar berishini da’vo qilgandi.

Izoh
Asosiy yangiliklar
Dunyo
Irlandiyadagi qamoqxonada “buyuk qochish”, sakkiz soatli ish rejimini qo‘llagan Genri Ford va qon quyish bo‘yicha birinchi muvaffaqiyatli amaliyot. Kun xronologiya...
Mahalliy
“Afg‘oniston iqtisodiyotini tiklash xalqaro hamjamiyatning umumiy ustuvor yo‘nalishi bo‘lishi kerak” — Vladimir Norov
Mahalliy
Foto: Dubay—Namangan—Dubay yo‘nalishida muntazam aviaqatnovlar yo‘lga qo‘yildi