Rossiya Ukrainaga qurol yetkazib berilishi bo‘yicha BMT Xavfsizlik kengashi yig‘ilishini o‘tkazishni talab qildi

Rossiya 8-sentabr kuni Ukrainaga chet el qurol-yarog‘lari yetkazib berilishi masalasi bo‘yicha BMT Xavfsizlik kengashi majlisini o‘tkazish haqida so‘rov kiritdi, deb yozadi “RBK” Rossiyaning tashkilotdagi doimiy vakili Vasiliy Nebenzyaga tayanib.

“Ertaga (8-sentabr) Ukrainaga xorijiy mamlakatlar tomonidan qurol-yarog‘ va harbiy xususiyatga ega mahsulotlar yetkazib berilishi ortidan xalqaro tinchlik va xavfsizlikka nisbatan yuzaga kelayotgan haqiqiy xavflarni muhokama qilishni taklif etamiz”, — dedi u 7-sentabr kuni.

Nebenzya qo‘shimcha qilishicha, Rossiya tomoni ma’ruzachi sifatida BMT bosh kotibining qurolsizlanish masalalari bo‘yicha o‘rinbosari Idzumi Nakamitsu va fuqarolik jamiyati vakillarini ko‘rishni istardi.

Keyinroq Rossiyaning BMTdagi doimiy vakili birinchi o‘rinbosari Dmitriy Polyanskiy o‘z Telegram-kanalida Xavfsizlik kengashidagi G‘arb diplomatlari Rossiyaning Kiyevga qurol yetkazilishi muammosi bo‘yicha majlis o‘tkazish so‘rovidan “mamnun bo‘lgani” haqida istehzoli post qoldirdi.

“Hamkasblarimiz uchun to‘qib chiqarilgan ‘filtratsiya’ni emas, haqiqiy muammolarni muhokama qilish vaqti keldi. Bizning syurprizimiz ularni quvontirgani yuzlaridan bilinib turgandi”, — deya qo‘shib qo‘ydi diplomat.

Avvalroq AQSH va Albaniya BMT Xavfsizlik kengashidan 7-sentabr kuni kechqurun majlis o‘tkazishni so‘rab, Rossiya hududida ukrainlarning “filtratsiya qilinishi”ni muhokama etishni talab qilgan edi.

AQSH va Yevroittifoq mamlakatlari Rossiya harbiy operatsiyasi boshlanganidan keyin Ukrainaga qurol-yarog‘, shu jumladan, HIMARS baravar o‘t ochish reaktiv tizimlari, Javelin va NLAW tankka qarshi majmualari, Stinger havo hujumiga qarshi majmualarini yetkazib berishni kuchaytirdi.

Rossiya G‘arb qurol yetkazib berish orqali faqat ziddiyatning cho‘zilishiga imkoniyat yaratayotganini bir necha marta ta’kidlagan. Kiyevga uzoq masofali qurol-yarog‘ taqdim etilishi maxsus operatsiya geografiyasining kengayishiga olib keladi, deya ogohlantirgandi Rossiya TIV.