Украина Қуролли кучлари бош қўмондони Валерий Залужний ва мудофаа қўмитаси раисининг биринчи ўринбосари Михаил Забродский «Укринформ» нашри учун қўшма мақоласида Украина «Қрим авиабазаларига, шу жумладан, Саки ҳарбий аэродромига кетма-кет муваффақиятли ракета зарбалари» берганини маълум қилди. Украина ҳарбий раҳбарияти биринчи марта Қримдаги портлашларга алоқадорлигини тан олмоқда, деб ёзади «РБК».
Мақола муаллифлари «Украина Қуролли кучларининг жанговар ҳаракатларни вақтинчалик босиб олинган Қрим ҳудудига кўчириш бўйича муваффақиятли саъй-ҳаракатлари» ҳақида айтган. «Гап душман томоннинг Қримдаги авиабазаларига, биринчи навбатда — Саки аэродромига кетма-кет муваффақиятли ракета зарбалари ҳақида бормоқда», — дейилади матнда.
Саки аэродромидаги портлашлар 9 август куни юз берди. Россия Мудофаа вазирлиги омбор вазифасини ўтаган майдонда бир қанча авиация ўқ-дорилари портлаб кетганини маълум қилганди. Идора маълумотларига кўра, аэродромга «ҳеч қанақа оловли таъсир» бўлмаган. Авиация техникасига зарар етмаган.
Қрим ҳукумати бир киши ҳалок бўлиб, олти киши жабрланганини маълум қилди. ОАВларга кўра, портлаш сабаби бўйича асосий версия хавфсизлик қоидаларининг бузилиши бўлган.
Киев бугунги кунга қадар Саки аэродромида юз берган ҳодиса учун жавобгарликни расман ўз зиммасига олмаган эди, бироқ The New York Times Украина Қуролли кучларидаги аноним манбасига таяниб, портлаш содир бўлган куниёқ бунинг ортида Украина тургани ҳақида ёзганди. CNN эса ўз қўлига келиб тушган Украина ҳукумати ҳисоботига таяниб, Киев ярим оролдаги Россия ҳарбий базалари ва қурол-яроғ омборига ҳужумлар учун жавобгарлигини тан олиши ҳақида хабар берганди.
Украина Мудофаа вазирлиги эса ёзда Американинг HIMARS баравар ўт очиш реактив тизимларидан Қримдаги Россия объектларига зарбалар беришда фойдаланилиши мумкинлиги ҳақида огоҳлантирганди.
Изоҳ (0)