Атом энергияси бўйича халқаро агентлик (МАГАТЭ) Украинанинг ядровий хавфсизлиги тўғрисида 52 бетли ҳисобот эълон қилди. Ҳужжат Россия назоратида бўлган ва ҳудуди мунтазам ўққа тутилаётган Запорожье атом электр станциясига МАГАТЭ делегацияси ташриф буюрганидан сўнг эълон қилинди.
Агентлик ЗАЭСнинг ўққа тутилиши Украина учун ҳам, қўшни давлатлар учун ҳам мисли кўрилмаган оқибатларга олиб келиши мумкинлигини таъкидлаб, зудлик билан станция атрофида хавфсиз ҳудуд яратишга чақирди.
Бундан ташқари, ҳисоботда айтилишича, ЗАЭСда «ядро хавфсизлигининг бутун етти аркони», жумладан, объектларнинг жисмоний яхлитлиги ҳамда радиация даражасини кузатувчи самарали воситаларининг ҳозирлиги бузилган.
Ҳисоботда асосий эътибор ўққа тутишлар оқибатида станцияга етказилган жисмоний зарарга қаратилган. Хусусан, миссия маълумотларига кўра, янги ва ишлатилган ядро ёнилғисини сақлайдиган бинолар, шунингдек, станцияни жисмонан ҳимоя қилишга мўлжалланган авария тизими мавжуд бино шикастланган.
МАГАТЭ Украинага уруш давомида ва у тугаганидан кейин ҳам барча зарур ёрдамни кўрсатишга содиқлигини маълум қилди.
1 сентябрь куни МАГАТЭ миссияси Запорожье АЭСга келган эди. Ташриф давомида агентлик инспекторлари станциядаги вайронагарчиликни баҳолаши, хавфсизлик тизимларининг қандай ишлашини аниқлаши, шунингдек, ходимларнинг иш шароитлари билан танишиши керак эди. Гуруҳ станцияда тахминан тўрт соат бўлди, шундан сўнг МАГАТЭ бош директори Рафаэл Гросси бошчилигидаги экспертларнинг бир қисми АЭС ҳудудини тарк этди. Ҳозир МАГАТЭнинг икки ходими ЗАЭСда кузатувчи сифатида қолмоқда.
Запорожье АЭС ҳудуди мунтазам равишда ўққа тутилмоқда. Россия ва Украина отишмада бир-бирини айбламоқда.
Изоҳ (0)