Pokiston hukumati mamlakatdagi eng katta chuchuk suvli ko‘lni quritishga harakat qilmoqda, ammo uchinchi urinish ham muvaffaqiyatsiz tugadi, deb yozadi Deutsche Welle.
Bir necha hafta davom etgan vayronkor toshqinlardan so‘ng Sind provinsiyasidagi Manchar ko‘lida suv sathi xavfli darajaga yetgan.
“Ko‘l tufayli minglab odamlarning hayoti xavf ostida qolmoqda”, — dedi provinsiya hukumati matbuot kotibi Murtazo Vahob.
Rasmiyning ta’kidlashicha, to‘g‘onlarni buzish orqali suv sathini pasaytirishga qaratilgan sa’y-harakatlarga qaramay, suv oqimining davom etishi oldinga siljishga to‘sqinlik qilmoqda.
Uning so‘zlariga ko‘ra, 100 mingga yaqin fuqaro uylarini tark etishga majbur bo‘lgan. Agar ko‘l suvga liq to‘lsa, yana yuz minglab odamlarni evakuatsiya qilishiga to‘g‘ri keladi.
Kuchli yomg‘irlar sabab Pokiston hududining uchdan bir qismi suv ostida qolgan. BMT va ba’zi xorijiy hukumatlar mamlakatga yuz millionlab dollar yordam va’da qilgan bo‘lsa-da, Islomobod vayronagarchilikni qayta tiklash kamida 10 milliard dollarga tushadi, deb hisoblamoqda.
Izoh (0)