АҚШнинг Афғонистон бўйича махсус вакили Томас Уэст Қўшма Штатлар Кобулдаги Россия элчихонаси олдида содир бўлган портлашни қоралаётгани ҳақида маълум қилди.
«АҚШ Россиянинг Кобулдаги элчихонаси олдида содир этилган терактни қоралайди», — деб ёзди у Twitter’даги саҳифасида.
Дипломат ҳалок бўлганлар ёки жароҳатланганларнинг оила аъзоларига ҳамдардлик билдирди.
«Бу зўравонлик ҳеч қандай мақсадга хизмат қилмайди», — деди Уэст.
Бирлашган Миллатлар Ташкилоти бош котиби Антониу Гутерриш ҳам ушбу терактни қоралаган.
«Бош котиб Кобулдаги Россия элчихонаси яқинида уюштирилган ҳужумни кескин қоралайди», — дейилади бош котибнинг расмий вакили Стефан Дюжаррик баёнотида.
Дюжаррикнинг таъкидлашича, Гутерриш «қурбонларнинг оила аъзоларига ҳамдардлик билдиради ва жароҳатланганларнинг тезроқ соғайиб кетишини тилайди».
«Бош котиб тинч аҳоли ва фуқаролик объектларига, жумладан, дипломатик миссияларга ҳужум қилиш халқаро гуманитар ҳуқуқлар томонидан қатъиян ман этилишини таъкидлайди», — дейилади баёнотда.
Эслатиб ўтамиз, 5 сентябрь куни эрталаб Россиянинг Кобулдаги дипломатик миссияси консуллик бўлимига кириш дарвозаси яқинида портлаш юз берганди. Россия Ташқи ишлар вазирлиги версиясига кўра, портловчи қурилмани «номаълум жангари» ҳаракатга келтирган.
Кейинроқ ҳодиса оқибатида Россия элчихонасининг икки ходими — қўриқчи ва дипломат ҳалок бўлгани маълум қилинди. Al Jazeera телеканали Афғонистон хавфсизлик хизматидаги манбасига таяниб хабар беришича, жами саккиз киши ҳалок бўлиб, 15 киши яраланган. «РИА Новости» манбаси эса 15 дан 20 нафаргача одам ҳалок бўлган ёки жабрланганини маълум қилганди. «Ал-Арабия» телеканали ўн нафар қурбон ҳақида хабар берганди.
Изоҳ (0)