Украина бугунги кунга қадар ҳарбий ҳаракатлардан кўрган зарарини 326 миллиард долларга баҳолайди. Бу ҳақда мамлакат бош вазири Денис Шмигал Евроиттифоқ ва Украинанинг Брюсселдаги Ассоциация кенгашида маълум қилди, деб ёзади «РБК».
Унинг сўзларига кўра, ушбу сумма бевосита жисмоний зарар бўлиб, уни Украина ҳукумати Жаҳон банки экспертлари билан биргаликда тасдиқлаган.
Шундан 105 миллиард доллари вайрон бўлган объектларни қайта тиклашга йўналтирилиши лозим, дея қўшиб қўйди Шмигал.
Украина президенти Владимир Зеленский аввалроқ мамлакат инфратузилмаси ва иқтисодиётини қайта тиклаш 600 миллиард долларга тушишини айтган ва бошқа давлатларни Украина минтақаларини оталиққа олишга чақирган эди.
Унинг сўзларига кўра, Киев Украинани қайта тиклаш бўйича кенг кўламли режа тайёрламоқда, аммо бунинг учун халқаро режа — «тарихий ‘Marshall режасиънинг замонавий варианти» ҳам керак бўлади. Июль ойида Луганодаги конференцияда Украина 750 миллиард доллардан зиёд қийматга эга мамлакатни қайта тиклаш режасини тақдим этганди.
«Marshall режаси» — АҚШ томонидан ишлаб чиқилган, Европа мамлакатларига урушдан кейинги ёрдамни тақдим этиш дастури. Унинг асосий мақсади 1948 йилдан 1952 йилгача бўлган даврда Иккинчи жаҳон урушидан кейин вайрон бўлган Европа иқтисодиётини қайта тиклашдан иборат бўлган.
Кремлда Россия активларининг Украина фойдасига мусодара этилишини номақбул ва ноқонуний деб аташди. «Бу тўғридан-тўғри ўғрилик бўлади», — деди Россия президенти матбуот котиби Дмитрий Песков.
Россия етакчиси мамлакат ЛХР ва ДХРни қайта тиклашда қатнашишини маълум қилди. Унинг кўрсатмасига биноан ДХР ва ЛХРдаги шаҳарларни қайта тиклаш учун масъулиятни Россия минтақалари ўз зиммасига олишни бошлади.
Изоҳ (0)