Россиянинг Кобулдаги элчихонаси яқинида содир бўлган портлаш учун жавобгарликни ИШИД гуруҳи ўз зиммасига олди, деб ёзади «РБК». Бу ҳақда Reuters жангариларга таяниб хабар берган.
Портлаш 5 сентябрь куни эрталаб дипломатик миссиянинг консуллик бўлимига кириш дарвозаси яқинида юз берган. Россия Ташқи ишлар вазирлиги версиясига кўра, портловчи қурилмани «номаълум жангари» ҳаракатга келтирган. ТОLО News телеканали полицияга таяниб аниқлик киритишича, худкуш террорчи элчихона яқинида тўпланган одамлар орасида ўзини портлатмоқчи бўлган. «РИА Новости» манбасига кўра, худди шу пайтда дипломат визага даъвогарлар исмларини эълон қилиш учун ташқарига чиққан. Хавфсизлик кучлари террорчини тўхтатиб қолган, шу лаҳзада портлаш содир бўлган.
Кейинроқ ҳодиса оқибатида Россия элчихонасининг икки ходими — қўриқчи ва дипломат ҳалок бўлгани маълум қилинди. Al Jazeera телеканали Афғонистон хавфсизлик хизматидаги манбасига таяниб хабар беришича, жами саккиз киши ҳалок бўлиб, 15 киши яраланган. «РИА Новости» манбаси эса 15 дан 20 нафаргача одам ҳалок бўлган ёки жабрланганини маълум қилганди. «Ал-Арабия» телеканали ўн нафар қурбон ҳақида хабар берганди.
Россия президенти матбуот котиби Дмитрий Песков ҳодисани теракт деб атади ва бундай хатти-ҳаракатларни қатъий қоралади.
Бу «Толибон» ҳаракати ҳокимият тепасига келганидан буён Россиянинг Афғонистондаги элчихонасига уюштирилган биринчи ҳужумдир. Толиблар Россия дипломатик ваколатхонаси хавфсизлигини кафолатлашини маълум қилганди. Портлашдан кейин улар айбдорларни топиб жазолашга ваъда берди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)