Россия ҳукумати Япония фуқароларига Курил оролларига визасиз ташриф буюриш имконини берган 1991 йилги келишувни бекор қилди, деб ёзади Meduza Россия бош вазири Михаил Мишустин имзолаган ҳужжатга таяниб.
Шунингдек, Мишустин 1999 йилги битимни ҳам бекор қилди, унга мувофиқ, Япония фуқаролари — Кунашир, Итуруп ороллари ва Кичик Курил тизмаси ороллари фуқаролари ва уларнинг оила аъзолари ушбу оролларга соддалаштирилган тартибда ташриф буюриши мумкин эди.
1991 йилги келишув — «СССР ташқи ишлар вазири ва Япония ташқи ишлар вазири ўртасида ўзаро ташрифлар тартиби ҳақидаги хатлар алмашинуви шаклидаги битим» бўлиб, у 1991 йил 14 октябрда имзоланган. Россия ТИВ ушбу келишув «Россиянинг жанубий Курил ороллари ва Япония ўртасидаги визасиз алмашинув»ни тартибга солишини маълум қилганди.
Шундан кейин Япония ҳукумати Москванинг ушбу қарори юзасидан Россияга «қатъий норозилик» билдирди. Япония вазирлар маҳкамаси бош котиби Хирокадзу Мацунонинг сўзларига кўра, Япония-Россия муносабатларнинг ҳозирги ҳолати учун айнан Россия жавобгар, бироқ Япония Курил оролларига ташриф буюриш бўйича чоралар кўришда унга халал бера олмайди.
Март ойида Россия ТИВ Россия Украинага бостириб кирганидан кейин Япония томонидан киритилган санкцияларнинг «очиқдан очиқ душманларча хусусиятини ҳисобга олиб» Япония фуқаролари учун Курилл оролларига визасиз режимни бекор қилишга қарор қилганини билдирганди.
Совет иттифоқи Иккинчи жаҳон уруши якунлари бўйича Жанубий Курил оролларини ўзига қўшиб олганди. 1956 йилда СССР Япония билан тинчлик декларациясини имзолаган ва тинчлик шартномаси тузилганидан кейин Шикотан ва Хабомаи оролларини қайтаришга ваъда берганди. Шундан кейин йиллар давомида Япония барча оролларни қайтаришни талаб қилиб келган, аммо шартнома имзоланмай қолган.
2022 йил мартида, Ғарб санкциялари жорий этилганидан кейин Россия Япония билан тинчлик шартномаси ҳақидаги музокараларни тўхтатганини эълон қилди. Апрель ойида Япония ТИВ 2003 йилдан буён биринчи марта Курил оролларини «ноқонуний босиб олинган» ҳудуд деб атади.
Жанубий Курил ороллари — Кунашир, Шикотан, Итуруп ва Хабомаи гуруҳи бўлиб, Япония Россиянинг улар устидан суверенитетига эътироз билдиришга уриниб келади. Токио ушбу ҳудудларни «шимолий» деб атайди.
Мавзуга доир:
- Япония Россиянинг «Восток-2022» ҳарбий машғулотлари ўтказилишидан хавотир билдирди
- Токио Россияни Курил оролларининг жанубий қисмида ҳарбий машғулотлар ўтказмасликка чақирди
- Россия Мудофаа вазирлиги Американинг ядровий сувости кемаси Курил оролларида Россия чегарасини бузиб киргани ҳақида хабар қилди. Пентагон буни рад этди
Изоҳ (0)