Туркия ва Исроил авиақатновларни қайта тиклашга келишиб олди, дея маълум қилди Исроил бош вазири Яир Лапид.
«Бугун ҳукумат Туркия ва Исроил ўртасида авиамулоқот ўрнатиш тўғрисидаги келишувни маъқуллади. Бундан буён Исроил самолётлари Истанбулга, шунингдек, Туркиянинг бошқа пунктларига қўниши ва учиши мумкин бўлади», — деб ёзади Лапид Twitter’да.
Исроил 2007 йилда Туркия билан авиақатновни тўхтатган эди, турк авиакомпаниялари эса Исроилга парвозларини давом эттирган, деб ёзади The Times of Israel. Газета Тель-Авивнинг бундай қарорига Туркия ҳукуматининг Исроил махсус хавфсизлик талабларини бажаришдан бош тортганини сабаб қилиб кўрсатади.
2022 йилда Исроил ва Туркия ўн йилдан буён совуқлашиб келаётган муносабатларни тиклашга киришди. Анқара ва Тель-Авив бир-бирини терроризмни қўллаб-қувватлашда айблаган эди. Исроилга Туркиянинг Ғазо секторидаги ҲАМАС гуруҳини қўллаб-қувватлаши ёқмасди, Туркия эса Исроилни «босқинчи давлат» деб ҳисобларди. 2018 йилда Туркия Исроилдаги элчисини чақириб олган ва Исроил элчисини Туркиядан чиқариб юборган.
2022 йилнинг июнь ойида Туркия ташқи ишлар вазири Мевлут Чавушўғли Исроил Ташқи ишлар вазирлигининг ўша пайтдаги раҳбари Лапид билан учрашган. Натижада томонлар икки томонлама муносабатларнинг дипломатик даражасини элчи даражасига кўтаришини маълум қилди.
17 август куни Лапид Туркия президенти Ражаб Тоййиб Эрдўғон билан телефон орқали мулоқот қилди. Улар дипломатик муносабатларни тўлиқ тиклашга ва икки давлат элчиларини пойтахтларга қайтаришга келишиб олди.
Изоҳ (0)