Латвия қирғоқлари яқинида хусусий самолёт ҳалокатга учради, унинг бортида таниқли бизнесмен ва оиласи бўлган

Болтиқ денгизида Cessna 551 хусусий самолёти ҳалокатга учради, деб ёзади Meduza. Reuters Швеция қутқарув хизматига таяниб хабар беришича, у Латвия қирғоқлари яқинига, Венспилсдан узоқ бўлмаган жойга қулаган.

Австрияда рўйхатдан ўтган самолёт 4 сентябрь куни Испания жанубидаги Херес шаҳридан учиб чиққан ва Германиянинг Кёльн шаҳрига қўниши керак эди. Унинг бортида тўрт киши бўлган.

Самолёт ҳавога кўтарилганидан кейин учувчи салондаги босим билан боғлиқ муаммолар ҳақида хабар берган, сўнг алоқага чиқмай қўйган. Парвоз чоғида самолёт икки марта — Парижда ва Кёльнда бурилиб олган, Болтиқ денгизи устидан, Швециянинг Готланд ороли яқинидан учиб ўтган. Сўнг тезлиги ва баландлигини йўқота бошлаган, охир-оқибат Латвия қирғоқлари яқинига қулаган.

Испания, Франция, Германия ва Данияда қирувчи самолётлар учувчилари ушбу хусусий самолёт билан алоқага чиқишга уринган. Аммо улар Cessna кабинасида ҳам, салонида ҳам ҳеч кимни кўра олмаган.

Кейинроқ маълум бўлишича, ҳалокатга учраган хусусий самолёт бортида аэротакси ва тиббий самолётлар ижараси хизматларини тақдим этувчи Quick Air авиакомпанияси хўжайини Карл-Петер Гриземанн рафиқаси, икки фарзанди ва икки ити билан бўлган. Самолётни Гриземаннинг ўзи бошқарган.

Quick Air’га 1992 йилда асос солинган. У Гриэсеманн Aviation Group гуруҳига киради, у эса ўз навбатида Гриэсеманн Group’нинг бир қисми ҳисобланади, у эса заводларни лойиҳалаштириш ва қуришга ихтисослашган халқаро компаниядир.