Германия канцлери Олаф Шольц Европа учун ягона ҳаво ҳужумига қарши мудофаа тизимини яратишни ёқлаб чиқди, деб ёзади Meduza.
Прагадаги Карл университетида нутқ сўзлаётиб, Шольц Европада ҳамкорликда ҳаво ҳужумига қарши мудофаа тизимини яратиш миллий даражадагидан кўра арзонроқ ва самаралироқ бўлишини айтди. Унинг сўзларига кўра, «биргаликда яратилган тизим бутун Европа хавфсизлигини оширган бўларди».
Прагадаги нутқида Шольц Евроиттифоқни кенгайтиришни ҳам ёқлаб чиқди. Канцлернинг сўзларига кўра, Ғарбий Болқон мамлакатлари, Украина, Молдова ва истиқболда Грузия ҳам Евроиттифоқнинг бир қисмига айланиши керак.
«Бу кенгайиш Европа Иттифоқи манфаатлари йўлида. Бу кунларда эркин Европа ва неоимпериалистик автократия ўртасидаги ажратувчи чизиқ энди қаердан ўтиши ҳақидаги савол яна кўтариляпти», — деди Шольц.
Ўз нутқида у Украинанинг ҳаво ҳужумига қарши мудофаа ва артиллерия соҳасидаги салоҳиятини ошириш учун Германия алоҳида масъулиятни зиммасига олиши кераклигини айтди. Унинг сўзларига кўра, Берлин Киевга ёрдам беришда давом этади ва яқин ҳафталарда Украинага замонавий қурол-яроғлар, шу жумладан, ҳаво ҳужумига қарши мудофаа тизимлари, радарлар ва учувчисиз учар қурилмаларни юборади.
Мавзуга доир:
- Германия Украинага қанча керак бўлса, шунча вақт ёрдам кўрсатишни ваъда қилди
- Шольц Байденнинг Россия ҳудудига зарбалар бера оладиган қурол-яроғни Киевга тақдим этмаслик ҳақидаги фикрини қўллаб-қувватлади
- Германия канцлери урушдан олдин Путинни Украина яқин 30 йил ичида НАТОга қабул қилинмаслигига ишонтирган
Изоҳ (0)