Украина армияси Херсон вилоятига ҳужум ҳақида маълум қилди. Россия Мудофаа вазирлиги «у шармандаларча муваффақиятсизликка учрагани»ни айтмоқда

Украина армияси анчадан бери кутилаётганидек, мамлакатнинг босиб олинган жанубий қисмига ҳужум бошлаганини маълум қилди, деб ёзади Meduza.

«Украина Қуролли кучлари Украина жанубида кўплаб йўналишлар бўйича, шу жумладан, Херсон вилоятида ҳам ҳужум ҳаракатларини бошлади», — деди «Жануб» қўриқлов ва мудофаа кучлари расмий вакили Наталья Гуменюк.

Ўз навбатида, «Каховка» тезкор қўшинлар гуруҳи ДХРнинг 109-полки ва уни қўллаб-қувватлаб турган россиялик десантчилар ўз позицияларидан чекинганини маълум қилди. Гуруҳ эълон қилган видеода россиялик ҳарбий ёки ДХР жангчиси деб тахмин этилаётган шахс 29 август куни Украина Қуролли кучлари (УҚК) «мудофаанинг биринчи чизиғини ёриб киргани»ни айтган. Бу ҳақда бошқа нашрлар ҳам ёзган.

Одесса вилояти ҳарбий маъмурияти раҳбари ўринбосари Алексей Мацулевич Херсон учун жанглар бошлангани ҳақида ёзиб, сўнг постини ўчириб ташлади. Бундан ташқари, Украина Telegram-каналлари УҚК бош қўмондони Валерий Залужнийга таяниб, Украина армияси Херсон вилоятидаги Сухой Ставок аҳоли пунктини эгаллагани ҳақида хабар тарқатди. Бироқ бу маълумот Залужнийнинг норасмий каналида пайдо бўлди ва ҳозирча расман тасдиқлангани йўқ.

Украина президенти офиси раҳбари маслаҳатчиси Михаил Подоляк жамоатчилик кўзи олдидаги шахсларни «супер шов-шувли баёнотлар» бермасликка чақирди. «Сизнинг истакларингиз ва орзуларингизни тушунаман. Аммо барибир бизнинг ҳар қандай ҳарбий ҳаракатларимизга нисбатан изоҳларнинг эҳтиёткорона форматидан келиб чиқишни таклиф этаман…» — деди у. Гуменюк қўшимча қилишича, «ҳар қандай жанговар операция жимжитлик талаб қилади». «Бундай ижобий янгиликларни одамлар жуда узоқ кутганини тушунган ҳолда, ҳақиқатан ҳам қандайдир ҳаракатлар бошлаганимиз ҳақида маълум қилишимиз мумкин эди. Бироқ бундан кейин ўзингизни тийиб туришни ва бу воқеаларни тарқатиб юбормасликни, қўшимча тафсилотларни қидириб топмасликни сўраймиз…» — дея аниқлик киритди у.

АҚШнинг икки мансабдори CNN’га УҚК «жиддий қарши ҳужум» учун шароитларни тайёрлаётгани ҳақида маълум қилди. Нашр суҳбатдошларига кўра, бундай операциялар ҳужум олдидан қилинадиган стандарт амалиёт бўлиб, жанг майдонини тайёрлаш учун қурол-яроғ омборларига, қўмондонлик пунктларига ва бошқа ҳарбий нишонларга зарбалар беришни ўз ичига олади. Ҳужум режаларига ўз таъсирини ўтказган нарсалардан бири шу бўлдики, АҚШнинг ҳисоб-китобларига кўра, Россия фронт олдинги чизиғига тахмин қилинганидан кўра камроқ бўлинмаларни жойлаштира олган, дея қўшимча қилди CNN журналисти Жим Шутто исми ошкор этилмаган америкалик мансабдорга таяниб.

Херсон вилоятининг Россия назорати остидаги маъмурияти ҳужум бўлмаганини маълум қилди. «Бу фейк, УҚК ҳужуми — бу қандайдир хом хаёл, кино. Ҳеч ким ҳеч қаерга ҳужум қилмаяпти, ҳеч ким чекинмаяпти. Буларнинг ҳаммаси фантазия. Хотиржам яшаяпмиз, ривожланяпмиз», — дея маълум қилди «маъмурият» вакили Кирилл Стремоусов «ТАСС»га. Унинг сўзларига кўра, «Ғарб Украина ҳукуматидан маълум бир ҳаракатларни талаб қилмоқда, Зеленский эса қандайдир чора кўрадиган ҳолатда эмас, шунинг учун ҳам тинч аҳолини ўққа тутишмоқда».

Херсоннинг уч нафар фуқароси Беларуснинг «Зеркало» нашрига маълум қилишича, шаҳарда жанглар бўлаётгани йўқ. Шу билан бирга, уларнинг сўзларига кўра, ўтган тунда портлашлар товушлари одатдагидан кўра кўпроқ эшитилган. Россиялик ҳарбий мухбир Роман Сапоньков Херсон ва Николаев вилоятлари чегарасидаги Давидов Брод қишлоғи яқинида (Херсондан тахминан 100 км узоқликда) бўлиб қайтганини айтиб берди. Унинг айтишича, туширилган десантлар шу заҳоти жангга киришиб кетганини кўрган. Айни вақтда Сапоньков қўшинларнинг бир қисми чекингани ҳақидаги маълумотни тасдиқлаган: «Эрталабдан иттифоқ қисмлари жуфтакни ростлаш бўйича сурияча нормативни бажарди. Сафарбар қилинган эркаклар, уларни айблашим қийин. Доимий хизматдаги десантларнинг кам-кемтикларини тузатишади».

Босиб олинган Новая Каховкада 29 август куни ўққа тутишлар туфайли иш жойларидан эвакуациялар ҳақида эълон қилинди. Украина томони ҳам Новая Каховка яқинида жойлашган Берислав шаҳрида машинасозлик заводига зарба берилгани ҳақида маълум қилди. Уларнинг талқинига кўра, заводда Россия армиясининг техникаси ва ўқ-дорилари бўлган, шунингдек, россиялик ҳарбийлар ҳам бўлган. Гуменюк босиб олинган ҳудудлар аҳолисини пана жой топишга чақирди ва «ҳозир воқеалар ривожи жуда тез бўлаётганини, вазият шиддат билан ўзгараётгани»ни айтди.

Россия Мудофаа вазирлиги Украинанинг ҳужуми муваффақиятсизликка учраганини маълум қилди. Муассаса талқини бўйича, УҚК Николаев ва Херсон вилоятларида учта йўналишда ҳужум қилган, аммо «катта талафотлар» кўрган. «Жанглар чоғида Украинанинг 26 та танки, 23 та пиёда қўшинлари жанговар машиналари, тўққизта бошқа жанговар зирҳли машиналар йўқ қилинди, иккита Су-25 самолёти уриб туширилди. Душман томоннинг аскарлар бўйича талафоти 560 кишини ташкил қилди. Душманнинг ҳужум ҳаракатларини амалга ошириш бўйича навбатдаги уриниши шармандаларча муваффақиятсизликка учради», — дея даъво қилмоқда Россия Мудофаа вазирлиги. УҚК Бош штаби ўзининг кечки маълумотномасида ҳужум ҳақида ҳеч қандай хабар бермади.

Кейинроқ CNN Украина армиясидаги манбасига таяниб, УҚК Херсон вилоятида тўртта қишлоқни озод этганини маълум қилди. Унинг сўзларига кўра, гап Томина Балка, Правдино, Новодмитровка ва Архангельское қишлоқлари ҳақида бормоқда. «Кўрамиз, бундан кейин нима бўларкан. Бизнинг нишонимиз — Херсон», — деди CNN манбаси.