Чехияда бўлиб ўтадиган йиғилишда Европа Иттифоқи ташқи ишлар вазирлари барча россияликларга виза беришни тақиқлаш ғоясини бир овоздан қўллаб-қувватлаши даргумон, деди ЕИ ташқи сиёсати раҳбари Жозеп Боррел.
«Россиянинг тинч аҳолиси билан муносабатларни тўхтатиш ёрдам беради деб ўйламайман, бу ғоя (россияликларга виза беришни тақиқлаш) эса Чехиядаги вазирлар йиғилишида керакли якдилликка эга бўлмайди, деган фикрдаман», — таъкидлади у.
Шу билан бирга, унинг сўзларига кўра, Европа Иттифоқи Россиянинг айрим фуқаролари, хусусан, россиялик олигархларга виза бериш тартибини қайта кўриб чиқиши керак.
30—31 август кунлари Прагада Европа Иттифоқи ташқи ишлар вазирларининг «Гимних» норасмий йиғилиши бўлиб ўтади, унда россияликларга туристик визалар берилишини чеклаш масаласи ва бошқа масалалар муҳокама қилинади.
«ТАСС»нинг Брюсселдаги дипломатик манбаси таъкидлашича, муҳокамада Россия фуқароларининг айрим тоифаларига визалар берилишини чеклаш мақсадида Шенген қонунчилигига ўзгартиришлар киритиш ҳақида сўз боради. Шу билан бирга, Financial Times вазирлар Россия билан виза тартибини соддалаштириш бўйича келишувни тўхтатиб туриш ғоясини қўллаб-қувватламоқчилигини хабар қилди.
Изоҳ (0)