Ироқ пойтахти Бағдодда шиалар етакчиси Муқтади ас-Садр ва ҳуқуқ-тартибот органлари ўртасида тўқнашувлар бошланди, оқибатда камида 15 киши ҳалок бўлди, деб ёзади «РБК».
Шифокорлар берган маълумотга кўра, қурбонларнинг ўн нафари отишмалар натижасида ҳалок бўлган. Ал Арабия нашри мухбири аниқлик киритишича, марҳумлар орасида икки нафар ироқлик ҳарбий бор.
Ал Ҳадатҳ ҳам 15 киши ҳалок бўлганини маълум қилди, яна 350 киши отишма ёки кўзни ёшлантирувчи газ туфайли жабр кўрган.
Ал Арабия маълумотларига кўра, ижтимоий тармоқларда тарқалган видеоларда АҚШнинг Ироқдаги ходимлари вертолётларда «яшил ҳудуд» (Бағдоднинг ҳукумат ва чет эл объектлари жойлашган тумани)дан олиб кетилаётгани акс этган. Бироқ Давлат департаменти норозиликлар фонида ўз дипломатлари эвакуация қилингани ҳақидаги ахборотни ёлғон деб атади.
Ироқдаги норозиликлар Муқтади ас-Садр ўз сиёсий фаолиятини якунлаш қарорини эълон қилганидан кейин яна кучайиб кетди. У бу қарорини мамлакатдаги сиёсий вазият боши берк кўчага кириб қолгани билан изоҳлади.
Шунда унинг тарафдорлари Бағдодда ҳукумат штаби мажлис ўтказадиган Республика саройига бостириб кирди. Вазирлар кенгаши иш тўхтатиб турилишини маълум қилди, Ироқ пойтахтида комендантлик соати эълон қилинди.
Ироқ бош вазири Мустафо ал-Козимий ас-Садрга мурожаат қилиб, ўз тарафдорларини ҳукумат бинолари ва «яшил ҳудуд»ни тарк этишга чақиришни талаб қилди.
Ироқдаги сиёсий инқироз 2021 йил кузидан буён давом этмоқда. Ўшанда мамлакатда парламент сайловлари бўлиб ўтган, қўлга киритилган мандатлар сони бўйича ас-Садр тарафдорлари етакчи бўлган эди. Сайловдан кейин янги бош вазир тайинланиши керак эди, бироқ бу ҳалигача амалга оширилгани йўқ, садрчилар эса парламентдан чиқишини эълон қилди. Бош вазир лавозимида 2020 йилда тайинланган Мустафо ал-Козимий ишлашда давом этмоқда.
Изоҳ (0)