«Агробанк» АТБ «Дарё» интернет нашри ва журналист Отабек Қўлдошевни судга берди. Банкирлар сайт ва сайт журналистини нохолисликда, мавзуга бирёқлама ёндашишда айбламоқда.
Гап шундаки, «Дарё» интернет нашрида 2022 йилнинг февраль ойида «Қашқадарёлик тадбиркор банклардан ярим миллиарддан ортиқ маблағини ололмагач, аҳолига тарқатилган чорва молларини тортиб олмоқда» сарлавҳали мақола эълон қилинган эди. Мақолада Нишон туманида фаолият юритувчи тадбиркор Гулмурод Бердиевнинг муаммоси тилга олинганди.
Таҳририятга мурожаат қилган нишонлик тадбиркор Гулмурод Бердиев Нишон туманидаги хонадонларга етказиб берилган чорва моллари учун 650 миллион сўм маблағини ололмай сарсон бўлаётганини, шу сабаб аҳолига тарқатилган чорваларини қайтариб олишга мажбурлигини, бу эса аҳоли норозилигига сабаб бўлаётганини билдирганди.
«Банк пулимни бермагач, одамларга берган молимни қайтариб олиб бўлса-да, харажатларимни қоплашим керак-ку. Мен ҳам харажатларимга куйиб қолмаслигим лозим. Менинг ҳам оилам, ишчиларим бор», — деганди тадбиркор «Дарё» мухбири билан суҳбатда.
Сайт журналисти билан суҳбатлашган тадбиркор «Агробанк» ва «Микрокредитбанк»нинг Нишон тумани филиаллари кафолат хатлари эвазига 20 дан ортиқ хонадонга 650 миллион сўмлик наслли чорва мол етказиб берганини, аммо орадан бир йил муддат ўтса-да, пулини ололмаганини айтганди.
Тадбиркорнинг ҳаракатига эътироз билдирган Нормат Бобоқулов кредит эвазига олган молларига ем-хашак бериб боқаётганини, қилинган харажатларига куйиб қолмаслик учун чорва молларини қайтариш нияти йўқлигини айтганди. Яна бир фуқаро Дилмурод Бекмирзаев эса «2021 йилнинг апрель ойида 20 миллион сўм маблағ эвазига икки бош ҳўкиз сотиб олгандим. Мен бу молларни семиртириб, анча боқдим. Емиши учун кўп маблағ сарф қилдим. Нега энди семиртириб, тайёр бўлган молимни бировга топширишим керак? Биз давлат сиёсатига ишониб, арзон ва кам фоизли чорва кредитидан олгандик. Энди эса бунақа томоша бўляпти. Буни назоратга олувчи масъуллар борми?», деганди.
Яна бир фуқаро Насиба Исматова эса сотиб олган сигири бузоқ туғганини, моллари кўпайгач, уни тортиб олишга ҳаракат қилишаётганини адолатсизлик деб билишини айтганди.
2021 йилнинг 15 декабрь куни «Агробанк»нинг Нишон тумани филиалидан чорва кредит олган Собир Абдуллаев давлат сиёсатига ишонганини ва давлат яратиб берган имкониятдан фойдаланганини, бироқ раҳбарлар халқ ишончини суиистеъмол қилганлиги боис қийин вазиятга тушиб қолганини, аммо молларини қайтариб бермаслигини билдирганди.
Мазкур масала юзасидан «Дарё» мухбири билан суҳбатлашган банк масъуллари муаммо тез орада ечимини топишини айтган бўлса-да, орадан уч-тўрт ойдан ортиқ муддат ўтишига қарамасдан «ана ҳал қилинади, мана ҳал қилинади», дегани, бироқ масала ечимсиз қолаётгани таъкидланган.
Шунингдек, банк раҳбариятидагилар бундай вазиятга тушган фуқаролар банкка мурожаат қилиши кераклигини, қачонки, банк раҳбариятига мурожаат қилиб, кредит шартлари бажарилиши сўралса, муаммо ечим топилишини айтганди.
Мазкур мақола эълон қилингач, «Агробанк» масъуллари ҳолатга расмий муносабат билдириб, «Daryo.uz расмий сайтида нашр этилган хабар журналист томонидан тўлиқ ўрганилмасдан эълон қилинган бўлиб, ҳолатга аниқлик киритиш мақсадида Қашқадарё вилоятига ишчи гуруҳ жўнатилди. Натижаси қўшимча тарзда эълон қилинади», деди.
Шундан сўнг банк раҳбарияти томонидан «Дарё»га эътирознома юборилиб, унда мақола муаллифи мақолада тадбиркор ва кредит эвазига чорва моллари харид қилган фуқаролар фикри билан чеклангани, банк масъулларидан маълумот олмагани иддао қилинган. Ва таҳририят томонидан раддия берилиши кераклиги уқтирилган.
Ваҳоланки мақола сўнгида журналистнинг банк масъуллари билан мазкур масала юзасидан боғлангани, масъуллар тадбиркор муаммоси «бугун ҳал этилади, эртага ҳал этилади»дан нарига ўтмагани ёзилган.
«Дарё» таҳририяти «Агробанк» эътирозномасига жавоб қайтариб, таҳририят томонидан раддия берилиши учун мақолада айнан банкнинг ишчанлик фаолиятига путур етказган, молия бозоридаги ҳуқуқ ва манфаатларининг бузилишига олиб келган, нохолис ёндашилган қисмини кўрсатиб бериш сўралди. Шундагина таҳририят томонидан раддия берилиши маълум қилинди. Бироқ банк раҳбарияти мазкур мақола банкнинг ишчанлик фаолиятига путур етказган, молия бозоридаги ҳуқуқ ва манфаатларининг бузилишига олиб келди деган умумий гаплар ва қонунлардан мисол келтиришдан нарига ўтмади. Шу сабаб таҳририят раддия беришни лозим топмади.
Таҳририят журналисти билан суҳбатлашган тадбиркорнинг айтишича, банк таҳририятга журналист ёлғон маълумот берди дея иддао қилиш баробарида мазкур мақола эълон қилингач, «‘Дарё'ни ёпишимиз керак», дея, кредит олган фуқароларнинг чорва моллари учун кредит пулларини ҳам тўлаб берган. Бу ҳақда таҳририятда маълумотлар мавжуд.
АТБ «Агробанк»нинг мазкур даъво аризаси 2022 йилнинг 30 август куни соат 10:30 да фуқаролик ишлари бўйича Мирзо Улуғбек туманлараро судида кўриб чиқилади.
Изоҳ (0)