Украинадаги вазият жуда оғирлигича қолмоқда, Европа Иттифоқи давлатлари унга ҳарбий ёрдам кўрсатишда давом этади, деди ЕИнинг ташқи ишлар ва хавфсизлик сиёсати бўйича олий вакили Жозеп Боррел иттифоқ мудофаа вазирларининг норасмий учрашуви олдидан.
Расмийлар Украинадаги вазиятни муҳокама қилишни давом эттиради, деди Боррел. Учрашувда Украина мудофаа вазири Алексий Резников ҳам иштирок этади.
«Вазият жуда ёмонлигича қолмоқда. Украина бизнинг ёрдамимизга муҳтож, биз эса уни ҳарбий маблағлар кўринишида етказишда давом этамиз, вазирлар Украина армиясини тайёрлаш бўйича юқори даражадаги миссия яратиш ғоясини ҳам муҳокама қилади», — деди Боррел.
Унинг сўзларига кўра, йиғилиш норасмий бўлгани учун миссия бўйича амалий қарорлар қабул қилинмайди. «Эҳтимол, бугун биз фақат сиёсий келишувга эришармиз. Тафсилотлар кейинроқ берилади. Мақсадлар ва ресурсларни аниқлаб берадиган процедура мавжуд», — дея тушунтирди у. Аввалроқ Боррел украиналик ҳарбийларни тайёрлаш миссияси Украина ҳудудига жойлаштирилмаслигини айтганди.
Боррелнинг қўшимча қилишича, шунингдек, ЕИ мамлакатлари вакиллари ўз мудофаа захираларининг тугаб бораётгани муносабати билан мудофаа харидлари ҳақида суҳбат қилади.
Изоҳ (0)