Бағдодда қўриқланадиган «яшил ҳудуд»га тўртта ракета келиб тушди

Бағдоднинг ҳукумат ва дипломатик муассасалар жойлашган, қўриқланувчи «яшил ҳудуд»ига тўртта ракета келиб тушди. Бу ҳақда Al Hadath ва Reuters хабар бермоқда, деб ёзади «РБК». Ракеталар турар жойларга зарар етказган, жабрланганлар ҳақида маълумот берилганича йўқ.

Тунда шаҳарда артиллерия ва ракета орқали отишмалар товушлари эшитилган, кўчаларда қуролланган одамлар юрган.

Айни пайтда Ироқда норозиликлар авж олган, намойишчиларнинг ҳуқуқ-тартибот органлари билан тўқнашувлари оқибатида, сўнгги маълумотларга кўра, 23 киши ҳалок бўлиб, 350 дан ортиқ одам жабрланган.

Аввалроқ ижтимоий тармоқларда тарқалган видеоларга таяниб, АҚШнинг Ироқдаги ходимлари вертолётларда «яшил ҳудуд» (Бағдоднинг ҳукумат ва чет эл объектлари жойлашган тумани)дан олиб кетилаётгани хабар берилган эди. Бироқ Давлат департаменти норозиликлар фонида ўз дипломатлари эвакуация қилингани ҳақидаги ахборотни ёлғон деб атади.

Ироқдаги норозиликлар Муқтади ас-Садр ўз сиёсий фаолиятини якунлаш қарорини эълон қилганидан кейин яна кучайиб кетди. У бу қарорини мамлакатдаги сиёсий вазият боши берк кўчага кириб қолгани билан изоҳлади.

Шунда унинг тарафдорлари Бағдодда ҳукумат штаби мажлис ўтказадиган Республика саройига бостириб кирди. Вазирлар кенгаши иш тўхтатиб турилишини маълум қилди, Ироқ пойтахтида комендантлик соати эълон қилинди.

Ироқ бош вазири Мустафо ал-Козимий ас-Садрга мурожаат қилиб, ўз тарафдорларини ҳукумат бинолари ва «яшил ҳудуд»ни тарк этишга чақиришни талаб қилди.

Ас-Садр ўзини хоҳ АҚШ ва Ғарб томонидан, хоҳ Эрон томонидан бўлсин, ҳар қандай чет эл аралашувига қарши чиқадиган миллатчи (националист) деб кўрсатади. Бироқ сайловлардан кейин садрчилар бошқа партиялар билан қарама-қаршиликлар туфайли ҳукуматни шакллантира олмади.

Ҳозир садрчилар мамлакат бош вазири лавозимига ас-Садрнинг рақиби — Муҳаммад ас-Суданий номзоди қўйилишига қарши чиқмоқда. У «Координацион тузилма» блоки вакили бўлиб, ушбу шиалар партияларининг сиёсий альянси, худди ас-Суданийнинг ўзи каби, намойишчилар фикрича, қўшни Эроннинг гумаштасидир.

Ироқдаги сиёсий инқироз 2021 йил кузидан буён давом этмоқда. Ўшанда мамлакатда парламент сайловлари бўлиб ўтган, қўлга киритилган мандатлар сони бўйича ас-Садр тарафдорлари етакчи бўлган эди. Сайловдан кейин янги бош вазир тайинланиши керак эди, бироқ бу ҳалигача амалга оширилгани йўқ, садрчилар эса парламентдан чиқишини эълон қилди. Бош вазир лавозимида 2020 йилда тайинланган Мустафо ал-Козимий ишлашда давом этмоқда.